Pry prodažy «Hrodna Azota» Biełaruś hatovaja pajści na minimalnyja sastupki

Biełaruś moža tolki «na paŭkroka» sastupić u pieramovach pa prodažy «Hrodna Azota». Pra heta zajaviŭ pieršy namieśnik premjer-ministra Biełarusi Uładzimir Siamaška žurnalistam na XIX Biełaruskim enierhietyčnym i ekałahičnym forumie ŭ Minsku.

Jon nahadaŭ, što 29 lipienia konkurs pa prodažy akcyj «Hrodna Azota» nie adbyŭsia — nichto z 4 mahčymych pretendentaŭ nie padaŭ zajaŭku.

«Idzie peŭnaja hulnia z boku pretendentaŭ pa źnižeńni koštu pakupki našaha pradpryjemstva», — zajaviŭ pieršy vice-premjer. Pry hetym jon admoviŭsia nazvać rynkavy košt «Hrodna Azota».

Pavodle jaho słoŭ, pieramovy pa pytańni ab prodažy akcyj buduć praciahnutyja ŭ ramkach pramych pieramovaŭ z patencyjnymi inviestarami.

Siamaška raskazaŭ, što na nastupnym tydni ŭ jaho adbudziecca sustreča z uładalnikam adnoj z rasijskich kampanij, zacikaŭlenaj u kupli pradpryjemstva.

«Hulnia pa źbivańni cany, źmienie ŭmoŭ konkursu bieśpierśpiektyŭnaja, — padkreśliŭ pieršy vice-premjer. — My kažam, što jość techničnaje zadańnie pa madernizacyi «Hrodna Azota» i my ad jaho ni na krok nie adydziem».

«Nu, moža, na paŭkroka, kab znajści kampramis», — dadaŭ Siamaška.

Nahadajem, u traŭni pieršy vice-premjer Biełarusi Uładzimir Siamaška paviedamiŭ, što čatyry rasijskija kampanii vykazvali cikavaść da kupli błok-pakieta akcyj AAT «Hrodna Azot».

Tak, cikavaść da ŭdziełu ŭ invieściravańni ŭ biełaruskaje pradpryjemstva prajaŭlali «Rasnafta», «Hazprom» i «JeŭraChim». Adkazvajučy na pytańnie pra čaćviortuju kampaniju, pieršy vice-premjer udakładniŭ, što heta ŭralskaje pradpryjemstva.

Konkursny adbor inviestara dla ŭdziełu ŭ pryvatyzacyi 25% plus 1 akcyja AAT «Hrodna Azot», jakija naležać Respublicy Biełaruś, byŭ abvieščany ŭ siaredzinie maja hetaha hoda.

Adnoj z hałoŭnych umoŭ prodažu błok-pakieta była cana nie mienš čym 414 młn dalaraŭ. Taksama było praduhledžana, što inviestar, padpisaŭšy inviestycyjnuju damovu z uradam Biełarusi, ź ciaham času moh stać ułaśnikam 50% plus 1 akcyja AAT «Hrodna Azot». Dla hetaha jon pavinien byŭ vykupić akcyi dadatkovaj emisii na sumu 440 młn dalaraŭ. Hetyja srodki nakiroŭvalisia na madernizacyju pradpryjemstva.

Važnaj umovaj mahčymaj pryvatyzacyi było «niedapuščeńnie inviestaram dla rabotnikaŭ AAT «Hrodna Azot» i ŭnitarnych pradpryjemstvaŭ, zasnavalnikam jakich źjaŭlajecca AAT «Hrodna Azot» paharšeńnia sacyjalnych i materyjalnych umoŭ, praduhledžanych pracoŭnymi damovami (kantraktami) i kalektyŭnymi damovami AAT «Hrodna Azot» i ŭnitarnych pradpryjemstvaŭ, jakija dziejničajuć na momant padpisańnia damovy kupli-prodažu akcyj AAT «Hrodna Azot» i nadalej, u pieryjad nie mienš čym piać hadoŭ z daty padpisańnia damovy kupli-prodažu akcyj AAT «Hrodna Azot».

Taksama patencyjny pakupnik hrodzienskaha zavoda abaviazvaŭsia na praciahu 5 hadoŭ z daty padpisańnia damovy kupli-prodažu akcyj AAT «Hrodna Azot» zabiaśpiečvać sielskuju haspadarku Biełarusi azotnymi ŭhnajeńniami «ŭ abjomach, štohod uzhodnienych ź Ministerstvam sielskaj haspadarki i charčavańnia, i pa canie, jakaja zabiaśpiečvaje rentabielnuju rabotu AAT «Hrodna Azot» i jaho raźvićcio».

Inviestar pavinien byŭ prafinansavać prajekt budaŭnictva novaha azotnaha kompleksu. Jaho płanavałasia zaviaršyć da 2020 hoda. Mahutnaść pradpryjemstva da hetaha času pavinna była skłaści pa amijaku 2,5 tys. ton u sutki (875 tys. ton u hod) mahutnaść cecha karbamidu 3,4 tys. ton u sutki hranulavanaha karbamidu (1190 tys. ton u hod).

Abaviazkovaj umovaj pryvatyzacyjnaj uhody źjaŭlałasia «najaŭnaść u inviestara ŭłasnaha resursu abo harantyi pastaŭščyka hazu na zaklučeńnie ź im kantrakta na pastaŭku pryrodnaha hazu ŭ abjomie, jaki zabiaśpiečvaje poŭnuju zahruzku vytvorčych mahutnaściaŭ AAT «Hrodna Azot» i novaha azotnaha kompleksu na praciahu nie mienš čym 10 hadoŭ, pa canie, jakaja zabiaśpiečvaje rentabielnuju pracu pradpryjemstva z normaj prybytku, jakaja harantuje biahučuju dziejnaść i absłuhoŭvańnie ŭsich kredytnych abaviazacielstvaŭ».

• 0
• 0
• 0
• 0
• 0
• 0
• 0
• 0