Artyleryst-ideołah: top-5 faktaŭ pra zvolnienaha ministra Aleha Pralaskoŭskaha
Ministr infarmacyi Aleh Pralaskoŭski adpraŭleny ŭ adstaŭku. «Naša Niva» uzhadvaje piać faktaŭ ź jahonaha žyćcia.
Artyleryst z Rasii
Aleh Pralaskoŭski naradziŭsia ŭ 1963 hodzie ŭ Sierhijevym Pasadzie, heta miastečka za 75 km ad Maskvy.
A ŭ Biełarusi jon atrymaŭ adukacyju, zakončyŭšy Minskaje vajskovaje inžyniernaje zienitnaje rakietnaje vučylišča.
Paśla pajechaŭ u Hiermaniju, słužyć u tamtejšaj hrupie savieckich vojskaŭ. Jahony dyvizijon znachodziŭsia za 40 km ad adnoj z NATAŭskich baz, uzhadvaŭ Pralaskoŭski.
Viarnuŭšysia ŭ Minsk, jon słužyŭ u rakietnym vučyliščy, a paśla staŭ vykładčykam u Vajskovaj akademii.
Paśpieŭ, darečy, zakončyć jurfak BDU.
Z vojska na ideałahičny front
Vajskovuju karjeru Pralaskoŭski ź ciaham času pramianiaŭ na infarmacyjna-prapahandysckuju. Z analityčnaha adździeła ŭ słužbie biaśpieki prezidenta jaho pieraviali ŭ infarmacyjnaje ahienctva BiełTA, pryčym adrazu dyrektaram.
Adtul Pralaskoŭski pierajšoŭ u Administracyju prezidenta. Spačatku namieśnikam kiraŭnika, a paśla kiraŭnikom Hałoŭnaha ideałahičnaha upraŭleńnia.
U 2007 čynoŭnik padaŭ u sud na «Narodnuju volu» i žurnalistku Marynu Koktyš za abrazu svajho honaru. Ahułam Pralaskoŭski atrymaŭ ad ich kala $12 tysiač.
U 2009 jon staŭ ministram infarmacyi. Pry jahonym papiaredniku Uładzimiru Rusakieviču «Naša Niva» spačatku była vyklučanaja z katałoha padpiski «Biełpošty» i šapikaŭ «Sajuzdruka», a paśla ŭ 2008 hodzie viarnułasia ŭ padpisku i prodaž.
Ad Pralaskoŭskaha-ministra «Naša Niva» atrymała niekalki papiaredžańniaŭ, a ŭ siaredzinie 2011 jahonaje viedamstva inicyjavała sudovy praces ab zakryćci haziety. Ad pazovu pradstaŭnik ministerstva admoviŭsia ŭ zali suda.
Adnoj sa svaich zadač na pasadzie ministra jon bačyŭ raźvićcio rehijanalnaj presy. Adnak «rajonki» dahetul małapapularnyja i adyhryvajuć na infarmacyjnaj prastory minimalnuju rolu.
Susied Piatkievič
Jak i inšym vysokim čynoŭnikam, Pralaskoŭskamu dazvolili pabudavać katedž u Drazdach, na vulicy Pakroŭskaj. Byłomu ministru naležyć dvuchpaviarchovy cahlany dom z mansardaj i altankaj ahulnaj płoščaj 455 m2.
Pobač ź im pasialiłasia pamočnica prezidenta Natalla Piatkievič. Praz darohu — miljanier Pavieł Tapuzidzis i były śpikier pałaty pradstaŭnikoŭ Vadzim Papoŭ.
Dački-pryhažuni
U siamji byłoha ministra dźvie dački.
Starejšaja, Volha, niekali apublikavała ŭ časopisie «Biełaruskaja dumka» vykryvalny artykuł pra sacyjalnyja sietki. «Apanienty ŭłady prykryvajuć svaje namiery kradzienymi łozunhami», «pratest nakiravany na dezyntehracyju biełaruskaha naroda i faktyčna pazbaŭlaje moładź i hramadstva toj samaj budučyni», — pisała jana pra dziejnaść «Revalucyi praz sacyjalnyja sietki» ŭ Biełarusi. A ŭ volny ad vučoby čas dziaŭčyna śpiavaje. Sceničnaje imia — Julijana. Pad takim psieŭdanimam jana trapiła ŭ lik pieramožcaŭ konkursu «Zorny dyližans» u siaredzinie 2000-ch. Ciapier Volha — maładaja mama.
Małodšaja Inha navučajecca ŭ Linhvistyčnym univiersitecie. Zrešty, hetuju ŭstanovu skončyła i jaje siastra. U akaŭncie Inhi vykładzienyja jaje zdymki z adpačynku. Kamientujučy ich, dziaŭčyna narakaje, maŭlaŭ, pakul niekatoryja jaje siabroŭki jeździać u Łondan, jana piaty raz zapar adpačyvaje ŭ Sočy.
Pavodle infarmacyi sa staronki «Ukantakcie», Inha pracuje pierakładčycaj u infarmacyjnym ahienctvie BiełTA, jakim raniej kiravaŭ tata. U jaje jość syn Jahor.
Telešou na BT
A voś takim byŭ Aleh Pralaskoŭski ŭ dałukašenkaŭskuju epochu. Razam z adnaj z dačok u 1994-m jon braŭ udzieł u telešou «Piać zorak» na BT. U efiry jon namahaŭsia havaryć pa-biełarusku, raspavioŭ, što jaho dačka vučycca ŭ Respublikanskim licei pry Akademii muzyki pa kłasie cymbałaŭ.
Kamientary