Bierlinskija haziety Bild i Berliner Zeitung źbirajuć podpisy pad pietycyjaj ab demantažy tankaŭ T-34 ź miemaryjała zahinułym savieckim voinam u Cirhartenie.
Haziety zaklikajuć hramadzian źviartacca ź listami pratestu suprać znakaŭ vajny da svaich pradstaŭnikoŭ u parłamiencie. «My nie chočam ruskich tankaŭ la Bradenburhskaj bramy z toj čas, kali ruskija tanki pahražajuć svabodnaj i demakratyčnaj Jeŭropie», — havorycca ŭ dakumiencie.
Rasija, havorycca dalej, upieršyniu z času zakančeńnia chałodnaj vajny «siłaj źmianiła miežy», ustanoŭlenyja «mirnaj revalucyjaj va Uschodniaj Jeŭropie» — «siońnia na miažy z Ukrainaj razhornutyja rasijskija vojski, jakija pahražajuć niezaležnaści suvierennaj dziaržavy». «My, nižejpadpisanyja, vystupajem suprać taho, kab vajennaja siła znoŭ stała instrumientam palityki Jeŭropy XXI stahodździa. My zaklikajem bundestah pryniać rašeńnie ab demantažy savieckich tankaŭ z memaryjału ŭ Cirhartenie», — abviaščaje tekst pietycyi.
Bild padkreślivaje, što «nie admaŭlajecca ad pavahi i śvietłaj pamiaci biaźmiernych pakut ruskaha naroda i jaho achviar padčas Druhoj suśvietnaj vajny».
«Adnak my ŭpeŭnienyja, što pamiać zahinuŭšych voinaŭ Čyrvonaj armii taksama nie pavinnaja apahańvacca zachopnickaj militarysckaj palitykaj ciapierašniaha Kramla i pucinskimi tankami», — reziumuje vydańnie.
Miemaryjał u Cirhartenie, pabudavany adrazu paśla zakančeńnia Druhoj suśvietnaj vajny, pryśviečany pamiaci savieckich sałdat, jakija zahinuli pry šturmie Bierlina. Pomnik ŭračysta adkryŭsia paradam vojskaŭ dziaržaŭ-pieramožcaŭ 11 listapada 1945 hoda. Jon znachodzicca blizu Brandenburhskaj bramy u 200 m ad Rejchstaha i karystajecca papularnaściu siarod turystaŭ jak adzin z troch savieckich vajennych miemaryjałaŭ u Bierlinie.
Ciapier čytajuć
Adstaŭny ministr-karupcyjanier pradaje reśpiektabielny katedž kala Drazdoŭ. Prosić $2 miljony3
Kamientary