Raźviedka ZŠA: Imaviernaść uvarvańnia Rasii va Uschodniuju Ukrainu raście
Vajennaja raźviedka ZŠA paviedamiła Kanhresu, što imaviernaść vajennaha ŭvarvańnia Rasii na terytoryju Uschodniaj Ukrainy vyšejšaja, čym ličyłasia raniej.
Pra heta karespandentu CNN u Pientahonie Barbary Star raskazali dźvie aficyjnyja asoby, jakija pažadali zastacca nienazvanymi.
Čynoŭniki adznačyli, što ŭpeŭnienaści ŭ takim raźvićci padziej niama, ale ŭ apošnija 3-4 dni byli «tryvožnyja prykmiety».
«Heta źmianiła našu dumku ŭ bok taho, što imaviernaść dalejšaha rasijskaha ŭvarvańnia bolš vysokaja, čym ličyłasia raniej», — skazaŭ adzin z čynoŭnikaŭ.
Čalcy kamiteta pa ŭzbrojenych siłach Pałaty pradstaŭnikoŭ ad respublikancaŭ u sieradu ŭviečary nakiravali list u Bieły dom, vykazaŭšy zakłapočanaść z nahody hetych pahroz.
Amierykanskaja raźviedka ličyć, što rasijskija vojski buduć ruchacca ŭ napramku troch haradoŭ Ukrainy: Charkaŭ, Łuhansk i Danieck, — kab źjadnać sušaj svaju terytoryju z Krymam.
Rasijskija vojski ŭ ciapierašni čas raźmieščanyja ŭ Rastoŭskaj, Kurskaj i Biełharadskaj abłaściach, daniesła raźviedka ZŠA. Na miažy z Ukrainaj skancentravana bolš za 30 tysiač sałdat RF, hatovych da «kidka».
Akramia taho, u stan mabilizacyjnaj hatoŭnaści pryviedzienyja padraździaleńni, raźmieščanyja ŭ hłybini rasijskaj terytoryi.
U kamitecie pa ŭzbrojenych siłach Pałaty pradstaŭnikoŭ nie vyklučajuć i kidka ŭ Prydniastroŭje, i sproby zachapić terytoryi ŭ krainach Bałtyi.
Hienierał Filip Brydłaŭ, kamandujučy siłami NATO, skazaŭ kanhresmienam, što skancentravanych la miežaŭ ruskich sił dla hetaha dastatkova.
Napiaredadni ŭkrainskija ŚMI paviedamlali, što Rasija praciahvaje kancentravać vojski na miažy z Ukrainaj, kudy padciahvajuć elitnyja tankavyja i hvardziejskija padraździaleńni.
Kamientary