40% biudžetnikaŭ ciapier buduć adpracoŭvać nie 2 hady, a 5?
Pa novych praviłach pastupleńnia ŭ VNU, na metavaje navučańnie voźmuć 60% ahraryjaŭ i 40% — na ŭsich inšych śpiecyjalnaściach.
Na naradzie pa pytańniach pastupleńnia va ŭniviersitety kiraŭnik dziaržavy prapanuje pavialičyć kolkaść abituryjentaŭ, jakija pastupajuć z nakiravańniem ad budučaha pracadaŭcy.
«Bo heta prosta vyznačyć budučaha nastaŭnika, budučaha vajennaha. U nas hetaha niama. Heta asnoŭnyja źmieny ŭ pryjomnych ispytach», — kaža Alaksandr Łukašenka.
Novyja praviły prymajuć 20 sakavika, za dva miesiacy da pastupleńnia. Na metavaje navučańnie pa ŭsich śpiecyjalnaściach buduć nabirać da 40%, a na ahrarnyja śpiecyjalnaści — da 60% studentaŭ, pieradaje BiełTA.
Ci nie stanie z-za hetych «asnoŭnych źmienaŭ» mienš miescaŭ dla zvyčajnych biudžetnikaŭ, jakija vučacca biez nakiravańnia i, adpaviedna, adpracoŭvajuć pa raźmierkavańni tolki dva hady? Cikavimsia ŭ hałoŭnaj VNU krainy.
«Išła havorka pra adrasnyja zajaŭki — ad sielskaj haspadarki, minabarony. Na śpiecyjalnaść, naprykład, menendžmient naŭrad ci buduć takija zajaŭki. Da taho ž, kali takija źmieny buduć, treba mianiać Pałažeńnie «Ab metavym nabory», — adkazvajuć Jeŭraradyjo ŭ pryjomnaj kamisii BDU.
Tut spadziajucca, što mnoha metavikoŭ nie pojdzie. Letaś pa nakiravańni ŭ BDU pastupała tolki kala 20 čałaviek siarod usich abituryjentaŭ.
«Ahulnaja kolkaść miescaŭ nie źmienšycca. Naprykład, jość 40 miescaŭ na niejkaj śpiecyjalnaści, 10 miescaŭ na metavy pryjom. Hetyja taksama biudžetnyja miescy, takaja ž forma navučańnia. Adpaviedna, toje samaje, tolki vypusknik pojdzie da kankretnaha pracadaŭcy, nu, i budzie tam adpracoŭvać 5 hadoŭ», — raskazvajuć u Biełaruskim technałahičnym univiersitecie.
A kali b pastupaŭ biez nakiravańnia — tolki dva hady.
Tracina pieršakurśnikaŭ Biełaruskaha ahrarna-techničnaha ŭniviersiteta ciapier vučacca dla kankretnaha pradpryjemstva — pastupili pa metavym zapycie.
«Dziaržava što za taho hrošy płacić, što za taho. Ale adzin adpracoŭvaje dva hady, druhi — piać. Kali hatovyja kankuravać, dobra, kali nie hatovyja — niachaj biaruć metavy zapyt i paśla 5 hadoŭ adpracoŭvajuć», — vykazvajucca ŭ hetaj VNU.
Siłaviki śćviardžajuć, što zatrymali dvuch mužčyn za hałasavańnie na vybarach u KR. Ale ci možna hetamu vieryć?15
Kamientary