Minimum troje z vasiemnaccaci ŭkrainskich čynoŭnikaŭ i biźniesmienaŭ, čyje aktyvy zamarožanyja ŭ krainach Jeŭrasajuza, źviazanyja ciesnymi dziełavymi adnosinami ź biełaruskimi pradpryjemstvami.
Samyja bujnyja biźnies-prajekty ź biełaruskimi partniorami va ŭładalnika Uschodnie-Jeŭrapiejskaj paliŭna-enierhietyčnaj kampanii (VIETEK) Siarhieja Kurčanki. Da padziej na Jeŭramajdanie jon ličyŭsia adnym z samych paśpiachovych maładych pradprymalnikaŭ Ukrainy.
U 2009 hodzie 24-hadovy Siarhiej Kurčanka stvaryŭ hrupu z 55 kampanij roznaha rodu dziejnaści pad nazvaj «Haz Ukraina», jakaja zatym była pieratvoranaja va Uschodnie-Jeŭrapiejskuju paliŭna-enierhietyčnuju kampaniju (VIETEK). Imklivy ŭźlot charkaŭčanina niezaležnyja ŭkrainskija ŚMI źviazvajuć ź jaho blizkaściu da kłana Janukoviča.
Stvoranaja Kurčankaj hrupa kampanij VIETEK zmahła faktyčna manapalizavać ukrainski rynak zvadkavanaha hazu, a taksama zaniać surjoznyja pazicyi ŭ handli naftapraduktami.
VIETEK maje trejdynhavymi kampanii ŭ mnohich krainach, ale mienavita pradpryjemstvy, jakija znachodziacca ŭ Biełarusi, byli asnoŭnymi pastaŭščykami naftapraduktaŭ va Ukrainu.
U pryvatnaści, kampanii Kurčanki kuplali bienzin i dyzielnaje paliva, pierapracavanaje na Mazyrskim i Navapołackam NPZ, u Biełaruskaj naftavaj kampanii, biełaruskich «dačok» rasijskich chołdynhaŭ TNK-BP (ciapier «Rasnafta»), «Łukojła», «Hazproma». U struktury prodažaŭ hrupy VIETEK na bienzin prypadała 56%, na dyzpaliva - 7%, na haz - 37%.
Ciapier «impieryja Kurčanki» pieražyvaje nie lepšyja časy.
Adrazu paśla pieramohi Jeŭramajdanu aliharch uciok za miažu. Ukrainskija vydańni paviedamlali, što Kurčanku dali prytułak u Biełarusi.
Kiraŭnik partyi UDAR Vital Kličko navat telefanavaŭ Alaksandru Łukašenku, patrabujučy vydačy Kurčanki i byłoha ministra ŭnutranych spraŭ Ukrainy Vitala Zacharčanki. Adnak Łukašenka zapeŭniŭ, što ni Kurčanki, ni Zacharčanki na terytoryi Biełarusi niama. Pavodle infarmacyi ŭkrainskich ŚMI, ciapier Kurčanka moža znachodzicca ŭ Maskvie.
Miž tym, jaho chołdynh razvalvajecca. U lutym 2014 biznesmen pieradaŭ Adeski NPZ rasijskamu banku VTB, u jakoha braŭ kredyt na nabyćcio zavoda.
U sakaviku 2014 hoda Nacyjanalny bank Ukrainy pryznaŭ niepłaciežazdolnymi dva banki, jakija ŭvachodzili ŭ chołdynh Kurčanki: «Brokierbiznesbank» i «Reał Bank». A ŭ kancy minułaha tydnia stała viadoma, što vydaviecki dom Forbes adklikaŭ u kampanii Kurčanki licenziju na vypusk viersii časopisa Forbes - Ukraina.
Na dumku ekśpiertaŭ, pieraraźmierkavańnie aktyvaŭ Kurčanki moža stvaryć prablemy dla prasoŭvańnia biełaruskich naftapraduktaŭ na ŭkrainski rynak.
U «čorny śpis» Jeŭrasajuza ŭklučanyja jašče niekalki bujnych ukrainskich biźniesmienaŭ, jakija majuć intaresy ŭ Biełarusi. Siarod ich były kiraŭnik administracyi prezidenta Andrej Klujeŭ i jaho brat Siarhiej Klujeŭ. Abodva ŭvachodziać u top-100 samych bahatych ludziej Ukrainy. Jany źjaŭlajucca saŭładalnikami šmatprofilnaj pramysłova-inviestycyjnaj hrupy «Ukrpadšypnik». U skład chołdynhu bratoŭ Klujevych ŭvachodzić Arciomaŭski mašynabudaŭničy zavod «Vistek», jaki pastaŭlaje elektrody na biełaruski rynak.
Nie vyklučana, što sumiesnyja biźnies-prajekty ź biełaruskimi pradpryjemstvami byli i ŭ Alaksandra Janukoviča-starejšaha syna Viktara Janukoviča.
Samy bujny aktyŭ Alaksandra Janukoviča - šviejcarskaja kampanija «MAKO-Trejdynh», jakaja zajmałasia ekspartam vuhalu. Pa vynikach pieršaha paŭhodździa 2013 hetaja kampanija pradała 400000 ton vuhalu ŭ roznyja krainy śvietu. Za hety ž pieryjad, jak śviedčać dadzienyja Nacyjanalnaha statyčnaha kamiteta, Biełaruś impartavała 17 tys. ton ukrainskaha antracytu na sumu 1,8 młn dalaraŭ.
Adnak pakul nieviadoma, ci pastaŭlaŭ syn byłoha ŭkrainskaha prezidenta vuhal u našu krainu.
Siłaviki śćviardžajuć, što zatrymali dvuch mužčyn za hałasavańnie na vybarach u KR. Ale ci možna hetamu vieryć?15
Kamientary