Skandał u minskim TIUHu: u «Troch parsiučkach» znajšli… palityčny padtekst

Kanflikt u Teatry junaha hledača ciahniecca z kanca minułaha miesiaca.

24 studzienia mastackaja rada teatra abjaviła niedavier dyrektaru Mikałaju Kaziulinu. 25 studzienia prajšoŭ ahulny schod.

Trupu aburyŭ toj fakt, što dyrektar uziaŭ kurs na stvareńnie zabaŭlalnaha praduktu. Akciory chacieli b zachavać teatr aśvietnickim.

Akramia taho, Kaziulin prapanavaŭ skasavać pasadu mastackaha kiraŭnika, jakuju zajmaŭ režysior Uładzimir Savicki. Pa jurydyčnym statusie hetaja pasada roŭnaja dyrektaru. Z taho času TIUH znachodzicca ŭ viry padziej.

U ŚMI prajšła infarmacyja, što dyrektar paprasiŭ prabačeńnia ŭ padnačalenych i vyrašyŭ syści. Ale siońniašni ahulny schod kalektyvu pakazaŭ, što Kaziulin nie źbiraŭsia zdavacca.

Na sustreču zavitali čynoŭniki – Ihar Karpienka, vice-mer Minska i lidar prałukašenkaŭskaj kampartyi, a taksama Vitalina Rudzikava, načalnik upraŭleńnia kultury Minharvykankama.

Karpienka paviedamiŭ, što pasada mastackaha kiraŭnika budzie zachavanaja. A pieršaj pastanoŭkaj teatra ŭ novym budynku stanie «Sinija ptuška» Morysa Mieterlinka, jakaja prademanstruje ŭsie techničnyja mahčymaści novaha budynka i novaj zały. Mienavita ad hetaj pastanoŭki płanavaŭ admovicca Kaziulin.

Ihar Karpienka namalavaŭ aptymistyčnuju karcinu chutkaha pierajezdu ŭ novy budynak, jaki zapłanavany na leta, a paśla – pastanoŭku novych śpiektaklaŭ. Ale aŭdytoryja sustreła hetyja słovy z abureńniem:«Vy nie bačyli, jak adkryvaŭsia Kupałaŭski teatr? Što vy nam kazki raskazvajecie!».

Akciory mieli na ŭvazie, što dla pierajezdu ŭ novy budynak i pieranosu śpiektaklaŭ na scenu zvyčajna patrabujecca šmat času.

Dalej słova atrymaŭ Mikałaj Kaziulin, jaki znoŭ zajaviŭ, što hatovy syści sa svajoj pasady, kali kalektyŭ jamu nie daviaraje (pieršy raz jon zajaviŭ heta na sustrečy ŭ harvykankamie). Kalektyŭ sustreŭ hetyja frazy avacyjaj. Ale całkam nie pavieryŭ Kaziulinu, bo padazraje jaho ŭ padvojnaj hulni.

Jak na schodzie, tak i ŭ kułuarach TIUHaŭcy skardzilisia, što dyrektar vyklikaŭ da siabie akcioraŭ, vykručvaŭ im ruki i imknuŭsia pieravabić na svoj bok

(naprykład, namieśniku načalnika adnaho z cechaŭ jon nibyta paabiacaŭ bolš vysokuju pasadu. Zrazumieła, za padtrymku).

Uładzimir Savicki pryvioŭ fakt, kali Kaziulin abvinavaciŭ jaho ŭ palitycy, jakaja nibyta prysutničaje ŭ dziciačych śpiektaklach. U pryvatnaści,

dyrektar znajšoŭ palityčny padtekst u kazcy «Try parsiučki», raźličanaj dla dziaciej ad 5 hadoŭ. Kaziulina źbiantežyli zakliki hierojaŭ budavać dom na dobrym padmurku.

U siońniašniaj situacyi TIUHu mienš za ŭsio patrebnyja kanflikty. U 2008 hoda teatr vyjechaŭ sa svajho budynku. Śpiektakli adbyvajucca na scenie Doma litarataraŭ, a techničnyja słužby znachodziacca na ŭskrajku horada — u budynku kinateatra «Elektron» la płoščy Kazinca.

Supracoŭniki zaprasili na nievialikuju ekskursiju pa pamiaškańniu.

Usie słužby mieściacca ŭ maleńkich pakojčykach, dzie nadzvyčaj ciesna i chałodna. Dekaracyi robiacca ŭ faje kinateatra. A tempieratura ŭ stalarnaj majsterni naohuł nulavaja.

Supracoŭniki prosiać paśpiašacca z ramontam. I znajści im dyrektara, jaki budzie zajmacca haspadarčymi pytańniami i nie budzie pieraškadžać im u tvorčych spravach.

• 0
• 0
• 0
• 0
• 0
• 0
• 0
• 0