Kitajski dypłamat jeździć u Biełarusi nie na Geely ci Great Wall, a na BMW

Naviedaŭšy prezientacyju novaha kitajskaha aŭtamabila Great Wall M4, daradca pa handlova-ekanamičnych pytańniach Pasolstva KNR u Biełarusi Lu Siuesun pahadziŭsia adkazać na niekalki pytańniaŭ.

- Nakolki vialikuju ŭvahu supracoŭniki Pasolstva Kitaja ŭ Biełarusi i asabista vy - daradca pa handlova-ekanamičnych pytańniach nadajuć pytańniam prodažu i vytvorčaści kitajskich aŭtamabilaŭ u našaj krainie?

- Dastatkova vialikuju - dola prodažaŭ kitajskich aŭtamabilaŭ u Biełarusi nie bolš za 3% ad abjomu ŭsich prodažaŭ novych mašyn, a značyć, jość prastora dla rostu. U 2012 hodzie tavarazvarot pamiž Kitajem i Biełaruśsiu skłaŭ 1,6 miljona dalaraŭ. Havorka nie tolki ab eksparcie hatovaj pradukcyi, ale i vytvorčaści. Ciapier pracuje sumiesnaje biełaruska-kitajskaje pradpryjemstva BiełDžy pa zborcy aŭtamabilaŭ Geely. U 2015 hodzie ŭ ekspłuatacyju budzie zdadzieny novy zavod, jaki budujecca na placoŭcy pamiž Barysavam i Žodzina.

Vytvorčaść aŭtamabilaŭ - značnaje pytańnie. U Kitai realizujecca stratehija «ažyćciaŭleńnie kitajskaj mary». Jana zaklučajecca ŭ roskvicie dziaržavy, pavieličeńni dabrabytu kožnaha hramadzianina, u ščaślivym žyćci kožnaha. Dla mnohich maładych ludziej taki aŭtamabil, jak M4, - taksama mara, ažyćciaŭleńniu jakoj dapamahaje vaš dyler. Miarkuju, što mašyny buduć karystacca dobrym popytam na rynku Biełarusi.

- Čamu zaciahnułasia źjaŭleńnie ŭ Biełarusi aŭtamabila kitajskaha brenda Zotye, ab pačatkach prodažaŭ jakoha kazali jašče ŭ pačatku hoda?

- Ja ničoha nie viedaju pra taki brend - Zotye.

— A na zavodzie ŭ Barysavie pa zborcy Geely byvajecie?

— Viadoma, bo tam idzie sumiesnaja zborka aŭtamabilaŭ, jakaja ažyćciaŭlajecca biełaruskimi i kitajskimi śpiecyjalistami. Być tam, słuchać spravazdačy, daviedvacca ab novych etapach - heta maja praca.

— U Barysaŭ jeździcie, viadoma ž, na Geely, sabranym u Biełarusi?

- Nie, jezdžu na mašynie niamieckaha brenda - BMW.

Ja pačynaŭ pracu ŭ Biełarusi dva hady tamu, tady Geely jašče nie było. A ŭ Piekinie kancern BMW daje dobruju źnižku kitajskim dypłamatam. Tamu vyrašyŭ kupić mašynu, zroblenuju ŭ Hiermanii.

— Dziŭna, što mašyna zroblena nie ŭ Kitai, dzie vyrablajecca šmat aŭtamabilnych brendaŭ. Čamu nie padtrymlivajecie miascovuju vytvorčaść ułasnym prykładam?

— Kali žyvu ŭ Piekinie, jezdžu na aŭtamabilach kitajskaj vytvorčaści.

— Zavod u Barysavie pa vytvorčaści Geely - dobry inviestycyjny prajekt. A jakija jašče prajekty, jakija ŭvasablajuć sumiesna ŭ biełaruskaj dziaržavaj, ličycie značnymi?

— Pierš za ŭsio, heta kitajska-biełaruski industryjalny park, budaŭnictva jakoha pačniecca ŭ Smalavickim rajonie. Učastak vydzieleny, jość ukaz prezidenta, raspracavany šerah ilhot. Chutka my abmiarkujem hienpłan na ŭzroŭni mižuradavaj kamisii z Kitajem i pačniecca budoŭla. Spadziajusia, praz hod u parku źjaviacca pieršyja budynki i rezidenty. U Biełarusi vyrablajecca bytavaja technika (mikrachvalevyja piečy), budujecca haściničny kompleks «Piekin», jaki płanujecca ŭvieści ŭ ekspłuatacyju da čempijanatu śvietu pa chakiei, idzie ŭźviadzieńnie žyllovaha masiva Labiažy la «Minsk- Areny».

- Ci sočycie za supracoŭnictvam ź biełaruskimi kampanijami na terytoryi Kitaja?

- Tak. Takich kampanij niamała. Da prykładu, u bujnym pramysłovym centry Kitaja - horadzie Charbin źbirajucca biełaruskija traktary, kambajny i inšaja sielhastechnika. U Piekinie pracuje SP ź BiełAZ, idzie sumiesnaja raspracoŭka novych madelaŭ hruzavikoŭ z kitajskimi zapčastkami.

- Jakim bačycie budučyniu aŭtamabilaŭ kitajskich brendaŭ u Biełarusi?

- U vas jość mahčymaści dla rostu prodažaŭ, Biełaruś - jeŭrapiejskaja kraina, dzie mašyna ŭ siamji - nieabchodnaść. Uzrovień žyćcia i zarpłaty padymajecca, mahčymaściaŭ kupić aŭtamabil usio bolš.

- Voś tolki, abvykšy da mašyn jeŭrapiejskaj jakaści, hramadzianie Biełarusi pakul nie śpiašajucca pierasadžvacca na aŭtamabili kitajskich brendaŭ …

— Treba čas, kab vy daviedalisia pra našu jakaść. Biełaruś — paŭnočnaja kraina z doŭhaj surovaj zimoj, my pavinny ŭdaskanalić aŭtamabili, kab jany padychodzili da ŭmoŭ ekspłuatacyi ŭ vašaj krainie.

Ciapier kitajskija mašyny sastupajuć u jakaści niamieckamu aŭtapramu, ale hod za hodam jany palapšajucca, nadydzie dzień — i jakaść stanie vysokaj.

Tady i ja siadu za rul aŭtamabila kitajskaha brenda.

• 0
• 0
• 0
• 0
• 0
• 0
• 0
• 0