Stvaralnik LLL-multfilmaŭ Aleh Minič, jakoha abvinavacili ŭ paklopie na prezydenta (art.367 č.2 Kryminalnaha kodeksu) pakinuŭ Biełaruś.
«Vielmi ŭsio niezrazumieła, adčuvaju siabie miž niebam i ziamloju», — adkazvaje Aleh pa telefonie na pytańnie pra jahonyja spravy. Jon staić na Majdanie, dzie śviatkujuć uhodki Aranžavaj revalucyi. Na scenu voś-voś pavinna vyjści Julija Cimašenka.
Aleh nie chacieŭ źjaždžać z Horadni, adnak paśla kansultacyj z pravaabaroncami i dopytaŭ u haradzienskim KDB kinuŭ usio. «Išło da taho, što mianie pasadziać na piać hod».
Dziakujučy mienskim znajomym Miniču ŭdałosia pakinuć Biełaruś dy źjechać u Maskvu. U rasiejskaj stalicy animatar miesiac žyŭ u hatelach, źviartaŭsia ŭ pravaabarončyja arhanizacyi, ale nijakaj praktyčnaj dapamohi nie atrymaŭ. Daviałosia pierabracca ŭ Kijeŭ.
Žonka Halina niadaŭna jeździła ŭ Horadniu — zabrać pryvatnyja rečy i vyśvietlić, ci pasunułasia napierad śledztva. Vyśviatleńnie akaličnaściaŭ spravy praciahnuli jašče na dva miesiacy, a techniku, kanfiskavanuju ŭ žniŭni, viartać nie źbirajucca. U Horadni Halina adčuvała vižavańnie za saboj.
Aleh charaktaryzuje svoj stan jak «zavisły». Ukrainski animatar Michał Barkoŭski, jaki ŭ pieršyja dni vykazvaŭ salidarnaść, adno tolki prapanavaŭ svaje pasłuhi ŭ malavańni multfilmaŭ. Płatnyja.
19 listapada biełaruski animatar braŭ udzieł u vystavie ŭkrainskich karykaturystaŭ «Karupcyja i prava». «Ja ščaślivy, kali mnie ŭdałosia raspluščyć vočy ludiam na toje, što naša ŭłada — nia strašnaja, a śmiešnaja», — kaža Aleh.
Času na toje, kab vyznačycca, u Miniča vobmal — miesiac. Mienavita stolki jon jašče moža prabyć va Ŭkrainie ŭ jakaści «turysta». «Palityčnaha prytułku prasić nie chaču. Pra svaje plany ciapier ničoha nie mahu skazać». Minič daŭ niekalki interviju ŭkrainskim žurnalistam i źviarnuŭsia u filijał arhanizacyi «Repartery biaź miežaŭ», jakaja ŭziałasia napisać zvarot u jahonaj spravie ŭ Senat ZŠA.
Pravaabaronca Biełaruskaha Chelsynskaha kamitetu Hary Pahaniajła kaža, što, kali biełaruski animatar baicca kryminalnaha pieraśledu, samy razumny krok — prasić palityčnaha prytułku.
Kamientary