Стваральнік LLL-мультфільмаў Алег Мініч, якога абвінавацілі ў паклёпе на прэзыдэнта (арт.367 ч.2 Крымінальнага кодэксу) пакінуў Беларусь.
«Вельмі ўсё незразумела, адчуваю сябе між небам і зямлёю», — адказвае Алег па тэлефоне на пытаньне пра ягоныя справы. Ён стаіць на Майдане, дзе сьвяткуюць угодкі Аранжавай рэвалюцыі. На сцэну вось-вось павінна выйсьці Юлія Цімашэнка.
Алег не хацеў зьяжджаць з Горадні, аднак пасьля кансультацый з праваабаронцамі і допытаў у гарадзенскім КДБ кінуў усё. «Ішло да таго, што мяне пасадзяць на пяць год».
Дзякуючы менскім знаёмым Мінічу ўдалося пакінуць Беларусь ды зьехаць у Маскву. У расейскай сталіцы аніматар месяц жыў у гатэлях, зьвяртаўся ў праваабарончыя арганізацыі, але ніякай практычнай дапамогі не атрымаў. Давялося перабрацца ў Кіеў.
Жонка Галіна нядаўна езьдзіла ў Горадню — забраць прыватныя рэчы і высьветліць, ці пасунулася наперад сьледзтва. Высьвятленьне акалічнасьцяў справы працягнулі яшчэ на два месяцы, а тэхніку, канфіскаваную ў жніўні, вяртаць не зьбіраюцца. У Горадні Галіна адчувала віжаваньне за сабой.
Алег характарызуе свой стан як «завіслы». Украінскі аніматар Міхал Баркоўскі, які ў першыя дні выказваў салідарнасьць, адно толькі прапанаваў свае паслугі ў маляваньні мультфільмаў. Платныя.
19 лістапада беларускі аніматар браў удзел у выставе ўкраінскіх карыкатурыстаў «Карупцыя і права». «Я шчасьлівы, калі мне ўдалося расплюшчыць вочы людям на тое, што наша ўлада — ня страшная, а сьмешная», — кажа Алег.
Часу на тое, каб вызначыцца, у Мініча вобмаль — месяц. Менавіта столькі ён яшчэ можа прабыць ва Ўкраіне ў якасьці «турыста». «Палітычнага прытулку прасіць не хачу. Пра свае пляны цяпер нічога не магу сказаць». Мініч даў некалькі інтэрвію ўкраінскім журналістам і зьвярнуўся у філіял арганізацыі «Рэпартэры бязь межаў», якая ўзялася напісаць зварот у ягонай справе ў Сэнат ЗША.
Праваабаронца Беларускага Хэльсынскага камітэту Гары Паганяйла кажа, што, калі беларускі аніматар баіцца крымінальнага перасьледу, самы разумны крок — прасіць палітычнага прытулку.
Цяпер чытаюць
Міністр сувязі: Абмежаванні мабільнага інтэрнэту закрануць 1,7 мільёна беларусаў9
Каментары