У Жлобінскім раёне мужчына перакладаў падлогу ў хляве і знайшоў старую зброю
Жыхар невялікай вёскі ў Жлобінскім раёне падчас планавага рамонту драўлянай падлогі ў сваім хляве знайшоў нечаканую рэч, паведамляе Дзяржаўны камітэт судовых экспертыз.
Калі мужчына пачаў мяняць старыя элементы падлогі, пад пластом пылу, павуціння і будаўнічага смецця ён знайшоў стары карабін з аптычным прыцэлам. На ствале зброі быў усталяваны самаробны глушыцель, груба, але трывала прымацаваны да дульнай часткі.
Было відавочна, што карабін працяглы час захоўваўся пад падлогай і быў схаваны ад чужых вачэй. Хто і навошта пакінуў яго там, высветліць адразу было немагчыма.
Мужчына вырашыў не нарывацца на праблемы і добраахвотна перадаў знойдзеную зброю супрацоўнікам міліцыі.
Пазней карабін накіравалі на судовую балістычную экспертызу. Эксперты ўстанавілі, што зброя вырабленая заводскім спосабам і з'яўляецца ручной наразной агнястрэльнай зброяй — карабінам «ТОЗ-16» калібру 5,6 мм. Ён прызначаны і прыдатны для стральбы патронамі 5,6×16R (.22 Long Rifle).
Таксама эксперты даследавалі дульную прыладу. Высветлілася, што яна была вырабленая саматужным спосабам і з'яўляецца кампанентам ручной наразной агнястрэльнай зброі — аднакамерным глушыцелем, прызначаным для памяншэння ўзроўню гуку стрэлу. Прылада таксама аказалася прыдатнай для выкарыстання паводле свайго прызначэння.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары