У расійскай франшызе пра халопаў выйшаў новы фільм — яго глядзяць і ў Беларусі
Камедыя «Халоп» з'явілася на экранах у 2019‑м і на некалькі гадоў стала самым касавым расійскім фільмам. Цяпер у беларускія кінатэатры завезлі ажно «Халопа-3».
У канцы 2019‑га расійскі рэжысёр Клім Шыпенка выпусціў камедыю «Халоп». У галоўныя героі ён паклікаў серба Мілаша Бікавіча. Той сыграў мажора Грышу, сына алігарха, якому яўна не хапіла бацькоўскага выхавання. Каб хоць трохі навучыць дарослага сына розуму, бацька арганізуе яму падарожжа ў жорсткія рэаліі прыгоннай Расіі, дзе хлопец знаходзіць каханне і стымул змяняцца ў лепшы бок. Каханую Бікавіча, дарэчы, грае Аляксандра Борціч — і гэта адна з зорных роляў беларускі.
«Халоп» сабраў у пракаце каля 62 мільёнаў даляраў і аказаўся адным з самых касавых фільмаў у расійскай гісторыі. Зрэшты, ці магло быць інакш? Тут вам і сямейныя каштоўнасці, і імкненне наставіць на розум ды пакараць багацеяў, і перамога справядлівасці — усё, што так важна расійскаму гледачу. Не кажучы пра тое, што гэта простая для разумення камедыя з добра прапісанай рамантычнай лініяй, прадстаўленая пад Новы год, калі глядзець складанае захоча не кожны.
Стваральнікі «Халопа» выпусцілі з таго часу сіквэл «Халоп-2», а таксама прадалі замежнікам правы на здымкі адаптацый. Свае «Халопы» ўжо выйшлі ў Манголіі, Францыі, Турцыі і Казахстане.
І вось цяпер — «Халоп-3». Экс-мажор Грыша кіруе праектам па перавыхаванні мажораў, дзе іх змяшчаюць у рэаліі мінулага гэтак жа, як некалі туды змясцілі самога Грышу. Працуе ён разам з эксцэнтрычным псіхолагам Львом Арнольдавічам (Іван Ахлабысцін), у іх шыкоўны офіс і касмічныя амбіцыі.
У той офіс прыходзяць дзеці буйных бізнэсменаў Вяземскіх. Іх бацькам вельмі трэба перавыхаванне: тыя так захапіліся эгаізмам і разбуральнымі паводзінамі, што ладзяць скандальны развод і заадно знішчаюць сямейную кампанію. Іх дзеці выкарыстоўваюць прызапашаныя 10 біткойнаў, каб зладзіць бацькам тое перавыхаванне.
На яго Вяземскіх адпраўляюць у дэкарацыі эпохі Пятра І — маўляў, у мажораў знайшліся сувязі з будаваннем караблёў, вось іх і змяшчаюць у часы імператара, дзякуючы якому ў Расіі з'явіўся флот. Іранічна, што расійскага імператара грае серб Бікавіч. Былы мажор Грыша перамог канкурэнтаў у барацьбе за гэтую ганаровую ролю.
Стваральнікі «Халопа-3» не сталі адмаўляцца ад традыцыйных метадаў мажорнага перавыхавання. Барыса Вяземскага (Павел Прылучны) адпраўляюць у тыя самыя халопы і ладзяць яму працатэрапію, а ягоную яшчэ пакуль жонку Алену (Крысціна Асмус) робяць багачкай.
У Барыса новая жонка — пышнацелая руская сялянка, у Алены новы муж — князь, нашмат старэйшы за яе. Новыя паловы, відавочна, мусяць падацца Вяземскім больш брыдкімі за стары варыянт з 21‑га стагоддзя, а заадно і зматываваць іх перагледзець стаўленне да свайго шлюбу. Шкада, што псіхолагу Ахлабысціну невядомыя іншыя метады барацьбы за каханне.
Вядома, «Халоп-3» атрымаўся наскрозь стэрэатыпным, і за гэта ў стужцы адказваюць сапсаваныя мажоры Вяземскія. Барыс лёгка прадае сямейную кампанію, звальняе шматгадовага супрацоўніка і патрабуе рабіць яму масаж проста ў офісе, Алена ж проста пры дзецях сварыцца з мужам настолькі, каб разбіць экран у дарагім тэлевізары. І як у такіх людзей атрымаліся разумныя і выхаваныя дзеці?
Гэта не адзіныя дзіркі ў сцэнарыі. Вяземскія — нагадаем, буйныя бізнэсмены! — аказваюцца настолькі дурнымі, што рэканструктары ад Ахлабысціна падсоўваюць ім турэцкага султана, які не размаўляе па-турэцку, і акцёраў, якія неаднаразова выдаюць сябе сучаснымі фразамі накшталт «ад усмешкі ўсім стане святлей».
І гэтыя ж людзі магічным чынам перавыхоўваюцца ад метадаў Грышы і Льва Арнольдавіча. Тое, што эксперымент удаўся — не спойлер, бо з самага пачатку ясна, якім будзе фінал.
Нягледзячы на прадказальнасць, глядзець «Халопа-3» можа быць цікава. Ахлабысцін, што і не дзіўна, спраўляецца з задачай паказаць псіхолага, якому самому трэба дапамога, Бікавіч і дзіцячыя акцёры таксама адпрацоўваюць на ўзроўні. Ад Прылучнага і Асмус патрабавалася толькі паказаць стэрэатыпных мажораў і іх магічнае перавыхаванне, гэтаму яны цалкам даюць рады.
Ды і сцэнар, хаця і дзіравы, атрымаўся дынамічным. Тут вам і сучасная Расія, і пятроўскія часы, і сам Пётр, а на дэсерт чакайце падарожжа ў Турцыю. Ёсць і шматлікія пасхалкі, напрыклад, да «Брудных танцаў».
Трэці з «Халопаў» відавочна прапагандуе сямейныя каштоўнасці. Вяземскія-старэйшыя, можа, і не гатовыя пазабіваць адно аднаго, але не надта супраць, калі гэта зробяць іншыя. Складана паверыць, што працатэрапія і пагрозы смерці могуць вярнуць у такую сям'ю любоў, а жорсткасць — перавыхаваць дзіцё ў целе дарослага чалавека. Але кожнаму пакаленню патрэбныя свае казкі.
«Наша Нiва» — бастыён беларушчыны
ПАДТРЫМАЦЬ
Каментары
Ардынскія халопы гэта самая нізкая форма жыцця на Зямлі.
Адвечная хітрая ідэя: каб зрабіць лепш, трэба зрабіць горш.
Цяжка дадумацца да простага "каб зрабіць лепш, рабі лепш".
У рускім свеце рабі дрэнна, жорстка, пасля растлумач, што насамрэч жадаеш добрага і так "навучаеш жыццю" (пераклікаецца з мараллю пра "настаўнікаў" булінгу-антыбулінгу ў карэйскім серыяле).
Няма сэнсу глядзець гэта ўсё, нават калі з элементамі добрай акцёрскай гульні. Не марнуйце час на тупіковыя танныя ідэі, якія падмацоўваюць цемрашальства і барацьбу за "скрэпы", пошук ісціны ў жорсткім мінулым, якое яшчэ больш жорсткае за сучаснасць.
З улікам і таго, што сусветны кінематограф столькі добрага і якаснага паздымаў, што жыцця не хопіць паглядзець найлепшае.