U rasijskaj franšyzie pra chałopaŭ vyjšaŭ novy film — jaho hladziać i ŭ Biełarusi

U kancy 2019‑ha rasijski režysior Klim Šypienka vypuściŭ kamiedyju «Chałop». U hałoŭnyja hieroi jon paklikaŭ sierba Miłaša Bikaviča. Toj syhraŭ mažora Hryšu, syna aliharcha, jakomu jaŭna nie chapiła baćkoŭskaha vychavańnia. Kab choć trochi navučyć darosłaha syna rozumu, baćka arhanizuje jamu padarožža ŭ žorstkija realii pryhonnaj Rasii, dzie chłopiec znachodzić kachańnie i stymuł źmianiacca ŭ lepšy bok. Kachanuju Bikaviča, darečy, hraje Alaksandra Borcič — i heta adna z zornych rolaŭ biełaruski.

«Chałop» sabraŭ u prakacie kala 62 miljonaŭ dalaraŭ i akazaŭsia adnym z samych kasavych filmaŭ u rasijskaj historyi. Zrešty, ci mahło być inakš? Tut vam i siamiejnyja kaštoŭnaści, i imknieńnie nastavić na rozum dy pakarać bahaciejaŭ, i pieramoha spraviadlivaści — usio, što tak važna rasijskamu hledaču. Nie kažučy pra toje, što heta prostaja dla razumieńnia kamiedyja z dobra prapisanaj ramantyčnaj linijaj, pradstaŭlenaja pad Novy hod, kali hladzieć składanaje zachoča nie kožny.

Stvaralniki «Chałopa» vypuścili z taho času sikveł «Chałop-2», a taksama pradali zamiežnikam pravy na zdymki adaptacyj. Svaje «Chałopy» ŭžo vyjšli ŭ Manholii, Francyi, Turcyi i Kazachstanie.

I voś ciapier — «Chałop-3». Eks-mažor Hryša kiruje prajektam pa pieravychavańni mažoraŭ, dzie ich źmiaščajuć u realii minułaha hetak ža, jak niekali tudy źmiaścili samoha Hryšu. Pracuje jon razam z ekscentryčnym psichołaham Lvom Arnoldavičam (Ivan Achłabyścin), u ich šykoŭny ofis i kaśmičnyja ambicyi.

Pavialičyć

U toj ofis prychodziać dzieci bujnych biznesmienaŭ Viaziemskich. Ich baćkam vielmi treba pieravychavańnie: tyja tak zachapilisia ehaizmam i razburalnymi pavodzinami, što ładziać skandalny razvod i zaadno źniščajuć siamiejnuju kampaniju. Ich dzieci vykarystoŭvajuć pryzapašanyja 10 bitkojnaŭ, kab zładzić baćkam toje pieravychavańnie.

Na jaho Viaziemskich adpraŭlajuć u dekaracyi epochi Piatra I — maŭlaŭ, u mažoraŭ znajšlisia suviazi z budavańniem karabloŭ, voś ich i źmiaščajuć u časy impieratara, dziakujučy jakomu ŭ Rasii źjaviŭsia fłot. Iranična, što rasijskaha impieratara hraje sierb Bikavič. Były mažor Hryša pieramoh kankurentaŭ u baraćbie za hetuju hanarovuju rolu.

Pavialičyć

Stvaralniki «Chałopa-3» nie stali admaŭlacca ad tradycyjnych mietadaŭ mažornaha pieravychavańnia. Barysa Viaziemskaha (Pavieł Pryłučny) adpraŭlajuć u tyja samyja chałopy i ładziać jamu pracaterapiju, a jahonuju jašče pakul žonku Alenu (Kryścina Asmus) robiać bahačkaj.

U Barysa novaja žonka — pyšnaciełaja ruskaja sialanka, u Aleny novy muž — kniaź, našmat starejšy za jaje. Novyja pałovy, vidavočna, musiać padacca Viaziemskim bolš brydkimi za stary varyjant z 21‑ha stahodździa, a zaadno i zmatyvavać ich pierahledzieć staŭleńnie da svajho šlubu. Škada, što psichołahu Achłabyścinu nieviadomyja inšyja mietady baraćby za kachańnie.

Pavialičyć

Viadoma, «Chałop-3» atrymaŭsia naskroź stereatypnym, i za heta ŭ stužcy adkazvajuć sapsavanyja mažory Viaziemskija. Barys lohka pradaje siamiejnuju kampaniju, zvalniaje šmathadovaha supracoŭnika i patrabuje rabić jamu masaž prosta ŭ ofisie, Alena ž prosta pry dzieciach svarycca z mužam nastolki, kab raźbić ekran u darahim televizary. I jak u takich ludziej atrymalisia razumnyja i vychavanyja dzieci?

Heta nie adzinyja dzirki ŭ scenaryi. Viaziemskija — nahadajem, bujnyja biznesmieny! — akazvajucca nastolki durnymi, što rekanstruktary ad Achłabyścina padsoŭvajuć im tureckaha sułtana, jaki nie razmaŭlaje pa-turecku, i akcioraŭ, jakija nieadnarazova vydajuć siabie sučasnymi frazami nakštałt «ad uśmieški ŭsim stanie śviatlej».

I hetyja ž ludzi mahičnym čynam pieravychoŭvajucca ad mietadaŭ Hryšy i Lva Arnoldaviča. Toje, što ekśpierymient udaŭsia — nie spojler, bo z samaha pačatku jasna, jakim budzie finał.

Niahledziačy na pradkazalnaść, hladzieć «Chałopa-3» moža być cikava. Achłabyścin, što i nie dziŭna, spraŭlajecca z zadačaj pakazać psichołaha, jakomu samomu treba dapamoha, Bikavič i dziciačyja akciory taksama adpracoŭvajuć na ŭzroŭni. Ad Pryłučnaha i Asmus patrabavałasia tolki pakazać stereatypnych mažoraŭ i ich mahičnaje pieravychavańnie, hetamu jany całkam dajuć rady.

Pavialičyć

Dy i scenar, chacia i dziravy, atrymaŭsia dynamičnym. Tut vam i sučasnaja Rasija, i piatroŭskija časy, i sam Piotr, a na desiert čakajcie padarožža ŭ Turcyju. Jość i šmatlikija paschałki, naprykład, da «Brudnych tancaŭ».

Treci z «Chałopaŭ» vidavočna prapahandyruje siamiejnyja kaštoŭnaści. Viaziemskija-starejšyja, moža, i nie hatovyja pazabivać adno adnaho, ale nie nadta suprać, kali heta zrobiać inšyja. Składana pavieryć, što pracaterapija i pahrozy śmierci mohuć viarnuć u takuju siamju luboŭ, a žorstkaść — pieravychavać dzicio ŭ ciele darosłaha čałavieka. Ale kožnamu pakaleńniu patrebnyja svaje kazki.

• 0
• 2
• 1
• 4
• 0
• 0
• 0
• 0