6 чэрвеня ў расійскай Цюмені адбыўся буйны пажар на мясцовым нафтаперапрацоўчым заводзе, які належыць кампаніі «Русінвест». Гэта найбуйнейшы незалежны НПЗ у Расіі і адзіны прамысловы нафтаперапрацоўчы завод ва Уральскай федэральнай акрузе, піша The Moscow Times.
Паводле афіцыйнай інфармацыі, узгаранне адбылося на ўстаноўцы ачысткі нафтапрадуктаў з-за парушэння тэхналагічнага працэсу. Улады адмаўляюць сувязь здарэння з магчымай атакай беспілотнікаў і заяўляюць, што паведамленні пра ўдар украінскіх дронаў не адпавядаюць рэчаіснасці.
Пажару быў прысвоены высокі ўзровень небяспекі. Для яго ліквідацыі прыцягнулі каля 80 ратавальнікаў і 23 адзінкі тэхнікі. Агонь ахапіў двухсекцыйную ўстаноўку гідраачысткі дызельнага паліва магутнасцю каля 3,6 мільёна тон на год.
Праз некалькі гадзін пажар удалося лакалізаваць, а затым поўнасцю ліквідаваць. Паводле звестак губернатара Цюменскай вобласці Аляксандра Маора, ніхто не пацярпеў. Абставіны здарэння будуць высвятляцца падчас расследавання.
Цюменскі НПЗ выпускае аўтамабільныя бензіны, дызельнае паліва стандарту Еўра-5, звадкаваныя вуглевадародныя газы, грануляваную серу, нафтавы кокс і іншую прадукцыю. Паводле розных ацэнак, магутнасць прадпрыемства складае ад 6 да 7,5 мільёна тон нафты на год.
Пасля пажару ў горадзе было зафіксавана павышэнне канцэнтрацыі прадуктаў гарэння, пылу і сажы ў паветры. Спецыялісты рэкамендавалі жыхарам, асабліва людзям з захворваннямі дыхальнай сістэмы, менш знаходзіцца на дварэ, трымаць вокны зачыненымі і па магчымасці выкарыстоўваць сродкі абароны дыхання і ачышчальнікі паветра.
Раней паведамлялася, што ў кастрычніку 2025 года ў раёне гэтага завода былі знішчаныя тры беспілотнікі, аднак тады сур'ёзных наступстваў для прадпрыемства не дапусцілі.
Генсак НАТА пра абстрэл Пецярбурга ў дні эканамічнага форуму: патрэбны дазвол Зяленскага, як на 9 мая
«ЛНР» следам за Крымам увяла ліміт на продаж бензіну
У Краснадарскім краі пасля атакі ўкраінскіх беспілотнікаў узнік пажар на НПЗ
У Растоўскай вобласці пасля нападу БПЛА загарэлася нафтасховішча, у Саратаўскай — НПЗ
Каментары