Кампанію «ЛадаГарант», якая раней была адным з буйных забудоўшчыкаў Мінска, прызналі банкрутам. Эканамічны суд Мінска 5 мая адкрыў працэс ліквідацыі, які павінен завяршыцца да студзеня 2027 года, паведамляе Office Life.
Фірму больш за 30 гадоў таму стварыў прадпрымальнік Аляксей Ваганаў. Спачатку яна называлася «Лада ОМС-Холдынг». У свой час кампаніі, звязаныя з Ваганавым, актыўна займаліся будаўніцтвам жылля ў Мінску і ўзвялі кварталы на праспекце Дзяржынскага, вуліцах Шчорса, Маякоўскага, Грушаўскай, Чыгуначнай і ў іншых раёнах.
Аднак не ўсе праекты аказаліся паспяховымі. Адзін з самых вядомых — гатэльны комплекс Novotel Minsk Mayakovskaya — так і не быў завершаны. Пазней недабудаваны аб’ект перайшоў дзяржаве і быў перароблены пад медыцынскую ўстанову. Кампанія «Лада ОМС-Інжынірынг», якая займалася гэтым праектам, збанкрутавала ў 2024 годзе і пасля была ліквідаваная.
На сённяшні дзень у «ЛадаГарант» запазычанасць перад крэдыторамі складае каля 4,3 мільёна рублёў. Пры гэтым кошт яе актываў ацэньваецца прыкладна ў 1 мільён рублёў. Сярод маёмасці — грошы на рахунках, дэбіторская запазычанасць, нерухомасць, энергетычныя аб’екты, а таксама акцыі ТК Банка і Банка БелВЭБ.
Таксама за кампаніяй лічацца трактар МТЗ і самазвал ГАЗ, але іх фактычнае месцазнаходжанне цяпер невядомае. Яшчэ ў 2020 годзе тэхніку перадалі іншай фірме.
Сам Аляксей Ваганаў апошнім часам больш звязаны з аўтамабільнай галіной. Летась з’явілася інфармацыя, што завод «Юнісон», да якога ён меў дачыненне, трапіў у судовыя справы аб магчымым прымусовым пераходзе маёмасці дзяржаве. Таксама прадстаўнікі «Лада ОМС Тэхна» прапаноўвалі арганізаваць выпуск спецыяльных аўтамабіляў для людзей з інваліднасцю на базе «Брэстмаша».
Каментары