«Свінні зарохкалі. Без вады даўно не сядзелі, я б ім адключыў». Азаронак абрынуўся на жыхароў раёна Лебядзіны
У сталічным мікрараёне Лебядзіны плануюць пабудаваць інтэрнат. Некаторыя жыхары не рады гэтай перспектыве — яны куплялі жыллё за немалыя грошы, бо раён прэзентаваўся элітным, і цяпер перажываюць, што садкі і школы будуць перапоўненыя і будаўніцтва закране зялёную зону.
Журналістка дзяржаўнага агенцтва «Мінск-Навіны» Вікторыя Кірычэнка абурылася паводзінамі жыхароў раёна.
«Праблема будаўніцтва інтэрната — толькі праблема пахіснуўшагася эга эліт Лебядзінага, якім пара спусціцца з нябёсаў на зямлю і зірнуць на сітуацыю вачыма чалавека», — пракаментавала яна ў відэа.
Далучыўся і прапагандыст Рыгор Азаронак. Праўда, як след не разабраўшыся ў сітуацыі, спачатку зблытаў Лебядзіны з Новай Баравой.
«Яны скучваліся. Ім падабаецца жыць асобна. За шлагбаумамі і платамі. У іх там «усе свае». Элітка. Мажорства. Залаты фонд. Свае дастаўкі, свае паркоўкі, свае салоны, сваё, элітнае, самавітае, з басейнамі на даху, сметанковае шчасце.
І раптам яны абурыліся. Завылі. Забрахалі. Свінні зарохкалі. Бачыце ці што — ім там інтэрнат пабудуюць. З «плебсам». Гэта значыць з настаўнікамі, дактарамі, студэнтамі», — напісаў Азаронак у сваім канале.
«Самае бруднае — гэта выццё з той нагоды, што, бачыце, інтэрнат будзе засланяць краявід, від на прыроднае хараство. Вось выйдуць два геі і Перлін са шкляначкай віскара палюбавацца прыгажосцю прыроды, а тут кухарка смажыць вячэру! Як такое можна трываць!» — разышоўся прапагандыст.
«І абураюцца ж, пачвары, і пішуць у чаціках, і маюць нахабства выканкамы даймаць.
Без вады, відаць, даўно не сядзелі, падонкі. Я б ім адключыў. А калі хочуць сабе «гета», то можна пасяліць іх усіх у асобны «дэмгарадок», — дадаў Азаронак (без вады засталася якраз Новая Баравая, а не Лебядзіны, дый вядучы Яўген Перлін жыве ў Новай Баравой).
Адзначым, што ў раёне Лебядзіны кватэры маюць таксама прэс-сакратарка Лукашэнкі Наталля Эйсмант і былы хакеіст, а цяпер сенатар Дзмітрый Баскаў.
Каментары