«Мінсктранс» пракаментаваў гісторыю з дзяўчынай, якая трапіла ў бальніцу пасля ўдару токам у тралейбусе
Як вынікае з каментара, дзяўчына аказалася не адзінай пацярпелай.
Днём 27 студзеня ў Мінску ў тралейбусе № 44 пасажырку ўдарыла токам.
Сама пацярпелая Дыяна распавяла ў тыктоку, што каля 16:45 на прыпынку грамадскага транспарту «Цэнтр міласэрнасці» на вул. Кальварыйскай заходзіла ў тралейбус. Узяўшыся за поручань, яна ступіла на падлогу, пасля чаго адчула моцны боль і страціла прытомнасць.
— Апрытомнела ўжо ў сярэдзіне салона, — распавяла дзяўчына. — Людзі сказалі, што я страшна крычала і нейкі мужчына літаральна адцягнуў мяне ад дзвярэй. Ужо дома я зразумела, што нага анямела, адчувальнасць так і не вярнулася, таму выклікала хуткую дапамогу.
У іншым відэа яна дадала: «Дактары дыягнаставалі праблемы з сэрцам, траўму галенастопа і стрэс». Зараз мінчанка знаходзіцца на лячэнні ў 4‑й гарадской клінічнай бальніцы.
У «Мінсктрансе» пра інцыдэнт з дзяўчынай даведаліся з сацсеткі, пішуць «Мінск-навіны». Ні да кіроўцы тралейбуса, ні да іншых прадстаўнікоў прадпрыемства дзяўчына не звярталася. Але там расказалі пра іншы выпадак.
— 27 студзеня каля 16:40 у тралейбусе маршруту № 44 на вул. Кальварыйскай адбылася ўцечка току — пацярпеў пасажыр-падлетак, які з папярэднім дыягназам «электратраўма» быў шпіталізаваны ў 6‑ю ГКБ. Пасля абследавання ён знаходзіцца дома, — распавялі на прадпрыемстве. — Да кіроўцы, як і да медыкаў, якія прыбылі, больш ніхто з пасажыраў не звяртаўся. Усе самастойна пакінулі месца здарэння. Зараз па дадзеным факце праводзіцца разбіральніцтва.
У «Мінсктрансе» дадалі, што пасля выздараўлення пацярпелым неабходна звяртацца ў філіял «Транспартны парк № 4» для складання акта аб прычыненні шкоды здароўю з наступнай яго перадачай у страхавую кампанію для пакрыцця шкоды.
Цяпер чытаюць
Гістарычныя +40,4°C у Пінску — гэта толькі разагрэў. Беларусь уваходзіць у новую кліматычную эру і на вачах стане лесастэпам14
Каментары
А маглі б адказаць што дзяўчыну дакладна ударыла токам маланка на вуліцы да трамвая і нават "сведкі" знайшліся б якія ў балаклавах чытаючы з паперкі распавялі што бачылі гэта на уласныя вочы. І што яна павінна даваць, а не патрабаваць нешта ад чырвона-зяленай дзяржаўнай арганізацыі якая цябе нарадзіла, выхавала і
выкарміла левай сіськай вусатага. Таму адпраўляйся за краты за"сепаратызм", "тэрарызм", "дзяржаўную здраду" і гд.