Расійскім каналам забаранілі пісаць пра аварыю з удзелам Адама Кадырава
Расійскія рэсурсы, блізкія да сілавых структур, атрымалі жорсткае распараджэнне ігнараваць ДТЗ у Грозным, у якім сур’ёзна пацярпеў сын кіраўніка Чачні Адам Кадыраў. Як стала вядома праекту «Можем объяснить», на навіны пра здарэнне накладзена забарона ў такіх папулярных рэсурсах, як Mash, Shot і Baza.
Паводле звестак супрацоўнікаў гэтых выданняў, забарона паступіла непасрэдна ад кіраўніцтва. У прыватнасці, галоўны рэдактар Shot Роберт Ключароў заблакаваў любыя згадкі пра аварыю ў аддзеле здарэнняў. Аналагічная сітуацыя склалася ў Mash і Baza.
Аналіз тэлеграм-каналаў пацвярджае інфармацыйную блакаду: Shot, які звычайна маланкава рэагуе на любыя надзвычайныя сітуацыі, апошні раз згадваў сям'ю Кадыравых яшчэ 12 снежня.
Што адбылося ў Грозным?
Паводле інфармацыі чачэнскай апазіцыі, здарэнне з удзелам картэжа Кадырава-малодшага адбылося ў Грозным.
Відавочцы апісвалі стан Адама Кадырава як «жахлівы». Траўмы аказаліся настолькі сур'ёзныя, што пасля спробаў рэанімацыі ў мясцовай бальніцы яго тэрмінова адправілі спецрэйсам у Маскву, у Боткінскую бальніцу. Мяркуючы па даных сэрвісаў маніторынгу палётаў, услед за бортам з пацярпелым у расійскую сталіцу вылецеў і сам Рамзан Кадыраў разам з блізкімі.
Чачэнскія ўлады паспрабавалі абвергнуць чуткі пра цяжкі стан Адама, апублікаваўшы відэа з яго ўдзелам на афіцыйным мерапрыемстве ў Грозным. Аднак журналісты высветлілі, што гэта былі так званыя кансервы — архіўныя кадры з сустрэчы, якая адбылася задоўга да аварыі.
Адаму Кадыраву ўсяго 18 гадоў, але ён даўно вядомая асоба як у Чачні, так і за яе межамі.
У верасні 2023 года Рамзан Кадыраў апублікаваў відэа, на якім тады 15‑гадовы Адам збівае ў СІЗА Мікіту Жураўля, абвінавачанага ў справе пра спальванне Карана. Тады кіраўнік Чачні заявіў, што ганарыцца сынам.
Пасля гэтага Адаму Кадыраву сталі прысвойваць розныя ўзнагароды, а да таго ж, нягледзячы на зусім малады ўзрост, ён заняў у Чачні некалькі высокіх пасад. Сярод іншага ён сакратар Рады бяспекі Чачні і куратар рэспубліканскага МУС.
-
Ізраіль высылае «Лекараў без межаў» з сектара Газа. Медыкі адмовіліся даваць імёны сваіх людзей у рукі сілавікоў, асцергаючыся рэпрэсій супраць персаналу
-
Абараніць Ізраіль і арабскіх саюзнікаў. ЗША не ўдараць па Іране, пакуль не залатаюць дзіркі ў СПА
-
Трамп вырашыў пабудаваць у Вашынгтоне гіганцкую трыумфальную арку, якая будзе большай за парыжскую
Каментары