Паводле даных Міністэрства гандлю ЗША, эканамічны рост у краіне ў трэцім квартале склаў 4,3% у параўнанні з 3,8% у папярэднім квартале. Такі вынік перавысіў чаканні і стаў самым высокім паказчыкам росту амерыканскай эканомікі за апошнія два гады, пiша Бі-бі-сі.
Справаздача паказала, што, нягледзячы на запаволенне росту рынку працы і занепакоенасць інфляцыяй, спажывецкія выдаткі выраслі на 3,5% у гадавым выражэнні ў параўнанні з 2,5% у папярэднім квартале.
На працягу 2025 года эканоміка Злучаных Штатаў адчувала сур'ёзны ціск з-за ўведзеных Дональдам Трампам кардынальных змен у гандлёвай і міграцыйнай палітыцы, а таксама ўразання бюджэтных выдаткаў.
І хоць гэта прывяло да рэзкіх ваганняў у некаторых галінах, такіх як імпарт і экспарт, у цэлым эканоміка, насуперак прагнозам, захавала ўстойлівую дынаміку.
Абвешчаныя паказчыкі аказаліся значна вышэй чаканых, пры тым, што большасць аналітыкаў прагназавалі гадавы тэмп росту на ўзроўні каля 3,2%.
На думку аналітыкаў, рост спажывецкіх выдаткаў у трэцім квартале года быў абумоўлены павелічэннем выдаткаў на медыцынскія паслугі.
Імпарт, які памяншае агульны паказчык росту, працягваў зніжацца з-за ўведзеных прэзідэнтам Трампам пошлін на пастаўкі ў ЗША.
У той час як экспарт, які раней рэзка ўпаў, аднавіўся, павялічыўшыся на 7,4%. Дзяржаўныя выдаткі таксама выраслі, дзякуючы тратам на абарону.
Гэтыя поспехі дапамаглі пераадолець спад інвестыцый, у тым ліку ў інтэлектуальную ўласнасць, а таксама праблемы на рынку жылля. Ён па-ранейшаму пакутуе ад высокіх працэнтных ставак, якія пагоршылі праблемы з даступнасцю жылля і дэфіцытам прапановы.
Па словах Майкла Пірса, галоўнага эканаміста Oxford Economics па ЗША, эканоміка краіны добра падрыхтавана да 2026 года, паколькі пачынае адчуваць эфект ад зніжэння падаткаў і нядаўніх мер цэнтральнага банка ЗША па зніжэнні працэнтных ставак.
«Асноўныя паказчыкі сведчаць пра стабільны рост», — сказаў ён.
Аднак аналітыкі папярэдзілі, што рост цэн, з якім сутыкаюцца некаторыя сем'і, можа ўскладніць падтрыманне незвычайна высокіх тэмпаў росту, якія назіраліся ў апошнім квартале.
У перыяд з ліпеня па верасень ключавы для Федэральнай рэзервовай сістэмы індыкатар інфляцыі — індэкс цэн на спажывецкія тавары і паслугі — вырас на 2,8% у параўнанні з 2,1% у папярэднім квартале, адзначаецца ў справаздачы.
Эксперты папярэджваюць, што рост цэн аказвае ціск на сем'і з нізкім і сярэднім даходам, у той час як сем'і з больш высокім даходам працягваюць траціць грошы без абмежаванняў.
Па словах Олівера Алена, старшага эканаміста Pantheon Macroeconomics, вынікі нядаўніх апытанняў і даныя па крэдытных картках сведчаць пра тое, што амерыканскія сем'і скарачаюць свае выдаткі.
«Слабы рынак працы, стагнацыя рэальных даходаў і трата зберажэнняў, назапашаных у перыяд пандэміі, здаецца, у канчатковым выніку адбіваюцца на сямейных бюджэтах», — адзначыў эксперт.
Іншыя нядаўнія даныя сведчаць пра паслабленне рынку працы, якое ўжо прымусіла Федэральную рэзервовую сістэму тры разы запар знізіць працэнтныя стаўкі.
Тым часам, як паведамляе агенцтва AFP, бум інвестыцый у штучны інтэлект з боку OpenAI, Google і іншых тэхналагічных гігантаў працягваў набіраць абароты, утрымліваючы амерыканскі фондавы рынак на ўзроўні, блізкім да рэкорднага.
У прагнозе S&P Global Ratings ад 18 снежня гаворыцца, што інвестыцыі ў штучны інтэлект, верагодна, падтрымаюць эканоміку, але іх эфект можа быць нівеліраваны палітычнай непрадказальнасцю прэзідэнцтва Трампа.
«Устаноўленыя законам тарыфныя стаўкі ЗША ў 2026 годзе, магчыма, не зменяцца значна, але нявызначанасць у дачыненні да законаў, норм, правіл інвеставання, ваенных дзеянняў і геапалітыкі ў цэлым застанецца высокай, — папярэджвае S&P. — Гэтая нявызначанасць, верагодна, будзе стрымліваць інвестыцыі і спажывецкія траты».
Каментары
Богатые богаче, бедные беднее.
Надежда на Трампа не сработала.