Ураган «Меліса» выклікаў маштабную паводку на Гаіці, колькасць ахвяр у рэгіёне працягвае расці
Як мінімум 25 чалавек, у тым ліку 10 дзяцей, загінулі на Гаіці з-за наступстваў урагану, галоўным чынам праз выкліканыя ім паводкі. На Ямайцы, якая таксама моцна пацярпела ад урагану, загінула да пяці чалавек. Усяго ў рэгіёне ўраган «Меліса» ўжо забраў жыцці 32 чалавек, паведамляе Бі-бі-сі.
Ураган пачаўся ў аўторак увечары і прайшоў па паўночнай частцы Карыбскага рэгіёну, пакінуўшы за сабой разбурэнні на тэрыторыі ад Ямайкі да Кубы і Гаіці. Цяпер ён рухаецца ў бок Бермудскіх астравоў.
Паводле даных Нацыянальнага цэнтра ўраганаў ЗША, хуткасць ветру дасягала 165 км/г, што адпавядае другой катэгорыі ўрагану. Аднак сіноптыкі прагназуюць, што ўраган будзе паскарацца ў паўночна-ўсходнім кірунку, у чацвер пройдзе на паўночны захад ад Бермудаў, а аслабне ў пятніцу.
На піку сваёй сілы хуткасць ветру «Мелісы» дасягала 298 км/г, што перавышае паказчыкі ўрагану «Катрына», які ў 2005 годзе разбурыў амерыканскі горад Новы Арлеан. Па інфармацыі AccuWeather, «Мелісса» стала трэцім па інтэнсіўнасці ўраганам у гісторыі Карыбскага рэгіёну, пры гэтым яна рухаецца найбольш павольна з усіх, што павялічвае разбуральныя наступствы.
Хоць ураган непасрэдна на Гаіці не абрынуўся, менавіта тут загінула большасць ахвяр — 25 чалавек, у тым ліку 10 дзяцей. Усё гэта праз паводкі выкліканыя моцнымі дажджамі, рака ў горадзе Пэці-Гааў выйшла з берагоў. Больш за тысячу дамоў затоплена, каля 12 тысяч чалавек размешчаныя ў часовых прытулках.
На Ямайцы ўраган стаў самым моцным, які калі-небудзь непасрэдна дасягаў вострава. Ён выклікаў апоўзні, знішчаў пальмы і зрываў дахі дамоў. Горад Мандэвіл быў амаль цалкам разбураны, асноўная дарога завалена абломкамі. Паводкі на Ямайцы забралі жыцці чатырох чалавек.
Да Кубы «Меліса» дабралася пасля Ямайкі як ураган трэцяй катэгорыі з хуткасцю ветру да 185 км/г. На ўсходзе краіны былі моцныя дажджы і паводкі. Больш за 735 тысяч чалавек былі эвакуяваныя. Прэзідэнт Кубы Мігель Дыяc-Канэль заклікаў людзей захоўваць пільнасць і адзначыў, што краіна была гатовая да «найгоршага сцэнару».
На Багамскіх астравах эвакуавалі амаль 1 500 чалавек. На астравах Цёркс і Кайкас дзейнічала папярэджанне аб трапічным шторме. Да ЗША паступілі запыты аб дапамозе з боку Гаіці і Багамскіх астравоў.
Афіцыйна прагназуецца, што «Меліса» не дасягне кантынентальнай часткі Паўночнай Амерыкі, але ў пятніцу ўвечары моцны экстратыпічны цыклон дасягне берагоў Канады і наблізіцца да горада Сэнт-Джонс.
Лукашэнка: Раман Пратасевіч — даўні супрацоўнік беларускай разведкі59
Каментары