Рух праз аўтамабільныя пункты пропуску на беларуска-літоўскай мяжы Літва ўчора вечарам зноў закрыла пасля таго, як на тэрыторыю краіны заляцелі метэазонды з кантрабандай.
Транспарт, які накіроўваецца з Беларусі праз пункты пропуску «Меднікі» (сумежны беларускі — «Каменны Лог») і «Салечнікі» («Беняконі»), літоўцы не прымаюць з 21.40, апошнюю машыну на ўезд у нашу краіну аформілі ў 00.00, паведаміў беларускі Мытны камітэт.
Зараз у электроннай чарзе на выезд з Беларусі ў указаных пунктах пропуску ўжо зарэгістравана звыш 1600 грузавых транспартных сродкаў.
У «Каменным Логу» па стане на восьмую раніцу стаяць 50 легкавых аўтамабіляў і шэсць аўтобусаў, у «Беняконях» — 60 легкавых аўтамабіляў.
Літва ўчора заявіла, што адкрые пункты пропуску сёння а 12.00.
Метэаралагічныя зонды з кантрабандай перасеклі літоўскую мяжу ў раёне Салечнікаў і Друскенікаў — з боку Гродна, Ліды. Праз шары працу спынілі аэрапорты Вільні і Коўна, а мяжу з Беларуссю зачынілі.
Праца аэрапортаў была адноўлена пад раніцу.
Пра тое, што мяжу будуць закрываць аўтаматам у выпадку паўтарэння сітуацыі з шарамі, Літва папярэджвала пасля папярэдняга такога інцыдэнту заўчора, у сераду 22 кастрычніка.
Каментары