Жонка Чарлі Кірка публічна прабачыла забойцу яе мужа. Трамп з ёй не пагадзіўся
У ЗША шырока абмяркоўваецца прамова Эрыкі Кірк, удавы кансерватыўнага актывіста Чарлі Кірка, на пахавальнай цырымоніі ў Глендэйле ў штаце Арызона, піша Bild. Яна выйшла на трыбуну і заявіла пра прабачэнне чалавека, які забіў яе мужа, сказаўшы: «Адказ на нянавісць — не нянавісць, адказ — любоў. Заўсёды любоў».
Такое прабачэнне, паводле слоў жанчыны, адпавядае хрысціянскаму вучэнню: як Ісус Хрыстос прасіў прабачэння для сваіх мучыцеляў на крыжы, так і Эрыка Кірк, глыбокая верніца, паставілася да забойцы мужа з любоўю і міласэрнасцю.
«За гэтыя дзесяць дзён пасля забойства Чарлі мы не ўбачылі гвалту. Мы не ўбачылі беспарадкаў. Рэвалюцыі мы не бачылі. Замест гэтага мы ўбачылі тое, пра што мой муж заўсёды маліўся — адраджэнне», — сказала яна.
Гэтыя словы выклікалі вялікі рэзананс у кансерватыўнай Амерыцы. Прэзідэнт ЗША Дональд Трамп выказаўся інакш: замест праграмы адзінства і прымірэння ён адкрыта заявіў, што не падзяляе пасланне Эрыкі і што сам не прабачае сваіх ворагаў, падкрэсліўшы адрозненне сябе ў гэтым ад Чарлі і Эрыкі.
«Я ненавіджу сваіх ворагаў. Я іх цярпець не магу», — сказаў ён у залу.
Амерыканскія СМІ ўхваляюць Эрыку і называюць яе магчымай новай палітычнай фігурай сярод кансерватараў. Тэлевяшчальнік MSNBC адзначыў, што яе словы — «менавіта тое, што Амерыка павінна была пачуць».
Газета Washington Post, блізкая да дэмакратаў, таксама звярнула ўвагу на розніцу паміж «бескампраміснай палітыкай Трампа» і «духам хрысціянскай любові да бліжняга», убачыўшы ў Эрыцы Кірк новую палітычную асобу.
Смерць Чарлі Кірка можа стаць паваротным момантам для рэлігійных кансерватараў. Арганізацыя Чарлі Кірка, Turning Point USA, якой цяпер кіруе Эрыка, перажывае рэкордны рост: з дня трагедыі дзясяткі тысяч маладых людзей далучаюцца да новых груп, а ў арганізацыю паступаюць мільёны даляраў ахвяраванняў.
Цяпер чытаюць
Як журналістка «Нашай Нівы» шукала пару на праваслаўным сайце знаёмстваў. Падкаціў і Талай36
Каментары
Тое ж тычыцца і здароўя Трампа.
Бо калі што, краінай будуць кіраваць Ванс і Сцівен Мілер, можаце гасіць святло і бегчы ў Аўстралію.