МАК не стаў мяняць умовы допуску беларускіх і расійскіх спартсменаў да Алімпіяды
Міжнародны алімпійскі камітэт пакінуў без змен умовы ўдзелу спартсменаў ад Беларусі і Расіі на Зімовых Алімпійскіх гульнях у Мілане і Карціна-д'Ампеца ў 2026 годзе. Яны застануцца такімі самымі, якія дзейнічалі для Алімпіяды-2024 у Парыжы.
Ніякія каманды ад Беларусі і Расіі ў спаборніцтвах удзельнічаць не змогуць. Тыя ж атлеты, якія прайшлі кваліфікацыю і маюць беларускі ці расійскі пашпарт, змогуць выступаць толькі як нейтральныя індывідуальныя спартсмены пад нейтральным сцягам і гімнам.
На Алімпіяду не будуць дапушчаныя спартсмены і персанал, якія актыўна падтрымліваюць вайну або знаходзяцца на кантракце ва Узброеных сілах Беларусі і Расіі, а таксама ў нацыянальных структурах бяспекі.
Нейтральныя спартсмены не будуць удзельнічаць у парадзе дэлегацый на цырымоніі адкрыцця, але змогуць прысутнічаць на ёй. Пытанне ўдзелу ў цырымоніі закрыцця будзе вырашацца падчас саміх гульняў.
Як і на Алімпіядзе ў Парыжы, для ацэнкі допуску спартсменаў будзе створана Камісія па разглядзе допуску індывідуальных нейтральных спартсменаў.
Каментары