ЗША скароцяць фінансаванне абароны еўрапейскіх краін, якія мяжуюць з Расіяй

Злучаныя Штаты плануюць паступова спыніць праграмы дапамогі ў сферы бяспекі для еўрапейскіх армій, размешчаных уздоўж мяжы з Расіяй. Аб гэтым піша FT, спасылаючыся на крыніцы, знаёмыя з сітуацыяй.

Гэты крок з'яўляецца часткай стратэгіі Вашынгтона, накіраванай на тое, каб прымусіць еўрапейскіх саюзнікаў браць на сябе большую фінансавую адказнасць за ўласную абарону.

Як піша FT, на мінулым тыдні прадстаўнікі Пентагона паведамілі еўрапейскім дыпламатам, што ЗША больш не будуць фінансаваць праграмы па навучанні і аснашчэнні ўзброеных сіл ва ўсходнееўрапейскіх краінах, якія ў выпадку канфлікту з Расіяй апынуцца на перадавой.

Гаворка ідзе пра праграму, вядомую як «раздзел 333». Хоць выдаткі па ёй павінен ухваляць Кангрэс ЗША, адміністрацыя прэзідэнта Трампа не запрасіла новых сродкаў на яе працяг. Ужо зацверджаныя сродкі будуць даступныя да канца верасня 2026 года.

Прадстаўнік Белага дома заявіў, што гэтае рашэнне адпавядае намаганням прэзідэнта Дональда Трампа «перагледзець і пераразмеркаваць» замежную дапамогу і звязана з указам, які ён падпісаў у першы дзень свайго знаходжання на пасадзе.

Па словах чыноўніка, гэтае рашэнне было ўзгоднена з еўрапейцамі і цалкам адпавядае як указу прэзідэнта, так і яго даўняму акцэнту на тое, каб Еўропа самастойна клапацілася пра сваю бяспеку.

Выданне ўдакладняе, што згортванне фінансавання па «раздзеле 333» закране праграму з сусветным бюджэтам больш за 1 мільярд даляраў, што можа прывесці да скарачэння сотняў мільёнаў даляраў дапамогі для краін, якія мяжуюць з Расіяй.

З 2018 па 2022 год на гэтыя мэты ў Еўропе было выдзелена $1,6 мільярда. Сярод асноўных атрымальнікаў — Эстонія, Латвія і Літва.

Як піша FT, прадстаўнікі Пентагона паведамілі пра скарачэнне фінансавання на сустрэчы з дыпламатамі з дзясяткаў еўрапейскіх краін. Характэрна, што на ёй прысутнічалі нават прадстаўнікі тых дзяржаў, якіх гэтая дапамога не тычыцца. Еўрапейскія ўрады былі здзіўленыя гэтай навіной і зараз спрабуюць атрымаць ад Вашынгтона дадатковыя тлумачэнні.

«Калі яны [ЗША] будуць дзейнічаць строга, гэта будзе мець вялікія наступствы», —

сказаў адзін з еўрапейскіх дыпламатаў, дадаўшы, што гэта адназначна закране НАТА, бо частка сродкаў ішла праз альянс.

Пры гэтым, як удакладняе FT спасылаючыся на крыніцу, знаёмую з пытаннем, рашэнне не закране асобную амерыканскую праграму замежнага ваеннага фінансавання (Foreign Military Financing), якая дазваляе краінам набываць вялікую вайсковую тэхніку, такую як знішчальнікі, караблі і танкі.

Скарачэнне дапамогі адбываецца на фоне імкнення Пентагона пераарыентаваць абаронныя рэсурсы ЗША на Інда-Ціхаакіянскі рэгіён для стрымлівання Кітая ў магчымым канфлікце з Тайванем.

Акрамя таго, як адзначае FT, пад пагрозай апынулася і будучыня Балтыйскай ініцыятывы ў галіне бяспекі — асобнай праграмы, створанай у 2020 годзе для ўмацавання армій Эстоніі, Латвіі і Літвы.

У мінулым годзе Кангрэс ухваліў 288 мільёнаў даляраў на падтрымку гэтай ініцыятывы. У бюджэце на наступны год Белы дом не запрасіў фінансавання для яе. Асоба, знаёмая з гэтым пытаннем, паведаміла, што адміністрацыя пераглядае праграму.

• 1
• 3
• 0
• 4
• 4
• 0
• 4
• 0