Трамп: «І я такі: дзіўна!» Стэнаграма заяваў Трампа і Рутэ ў Белым доме

Зброя для Украіны

• Мы заключылі сёння пагадненне з НАТА, калі мы будзем адпраўляць ім зброю, а яны будуць плаціць за яго.
  
  
• НАТА зможа купіць у ЗША вайсковай дапамогі на мільярды даляраў, усё гэта будзе хутка дастаўлена на поле бою.
  
  
• «Пэтрыёты» прыбудуць у поўным камплекце. Некаторыя прыбудуць праз некалькі дзён.
  
  
• Каардынаваць пастаўкі будуць генеральны сакратар Марк Рутэ і пастаянны прадстаўнік ЗША пры НАТА Мэцью Уітакер.
  
  
• Ёсць краіна, якая можа перадаць 17 «Пэтрыётаў». Магчыма, не ўсе, але большая частка з іх адправіцца на поле бою.

Трамп: Мы хочам забяспечыць, каб Украіна зрабіла, што павінна. Але, можа быць, Украіна адчуе сябе настолькі натхнёнай, што перастане хацець здзелку? 

Рутэ (перабівае): Украіна хоча здзелку і яна будзе прыхільная гэтаму пагадненню, няма ніякіх сумневаў у гэтым.

Трамп: Украіна павінна працягваць хацець здзелку.

Рутэ: Я згодны.

Трамп: А то раптам так атрымаецца, што яна не захоча.

Рутэ: Мы забяспечым гэта.

Трамп: Мы забяспечым. Я ўпэўнены, што яны зробяць, што павінны.

• Мы ведаем, што павінна быць зроблена. І гэта будзе вельмі моцна.

Санкцыі

• Калі Расія не пагодзіцца на здзелку, то праз 50 дзён ЗША ўвядуць другасныя пошліны ў памеры 100% на яе гандлёвых партнёраў.
  
  
• 500% уводзіць няма сэнсу. Калі мы ўвядзем 100%, эфект будзе той жа.

Гатоўнасць Еўропы падтрымліваць Украіну да канца

• У Еўропы вельмі высокі баявы дух да працягу [падтрымкі Украіны]. Калі я ўпершыню ўцягнуўся ў гэта, я не думаў, што ён будзе такім. Але ён такі. І я сказаў ім у мінулым месяцы: іх дух дзіўны. Яны сапраўды думаюць, што гэта вельмі-вельмі важная рэч. Глядзіце, цяпер яны плацяць за ўсё. А мы больш не плацім.
  
  
• Я размаўляў з Германіяй і іншымі краінамі, і яны гатовыя ісці вельмі далёка. Яны не хочуць, каб гэта працягвалася. Думаю, Пуціну варта было б… Ягонай эканоміцы вельмі дрэнна. Яму трэба ратаваць сваю эканоміку, ратаваць краіну. І, ведаеце, у яго выдатная краіна для гандлю, калі б ён траціў гэтыя актывы на нешта іншае замест вайны.

Пра Пуціна

• Я расчараваны прэзідэнтам Пуціным, таму што я хацеў здзелку два месяцы таму.

Рутэ: Пуцін ні разу не паслаў сур'ёзных людзей у Стамбул. Я памятаю, як вы, Рубіа, Уіткаф былі гатовыя да гэтых перамоў. Мы націснулі на ўкраінцаў, каб яны адправілі высокапастаўленую каманду ў Стамбул, і яны адправілі. А затым расіяне даслалі гэтага гісторыка, які расказваў нам гісторыю Расіі з 1215 года.

Трамп: Мы шмат гаварылі з Пуціным. Я кладу трубку, і такі: «Гэта была добрая размова», а потым ракеты ляцяць на Кіеў і іншыя гарады. І я такі: «Дзіўна». І калі гэта адбываецца 3-4 разы, ты разумееш, што гэтыя размовы нічога не значаць.

• Я прыходжу дадому, кажу першай лэдзі [Меланіі Трамп]: «Ты ведаеш, я гаварыў з Уладзімірам сёння, у нас была выдатная размова». Яна кажа: «Так? Яны толькі што ўдарылі яшчэ па адным горадзе». Так што… Я не хачу казаць, што ён забойца, але ён цяжкі хлопец. Гэта праверана часам.
  
  
• Ён дурыў многіх людзей, ён дурыў Клінтана, Буша, Абаму, Байдэна, але ён не абдурыў мяне. Ведаеце, у нейкі момант размова не клеіцца, павінны быць дзеянні.
  
  
• Разы з чатыры ён казаў: «Так, у нас можа быць здзелка, выглядае нядрэнна». А затым ляцяць бомбы.

Пра прыпыненне паставак зброі Украіне два тыдні таму

• Сёння вельмі вялікі дзень. Мы з Пітам [Хегсэтам] ведалі, што ён наступіць, таму вырашылі перагледзець. Мы не маглі б зрабіць тое, што робім сёння, не ведаючы, колькі ў нас засталося [на складах]. Таму мы зрабілі невялікую паўзу, і сёння ў нас вельмі вялікая падзея.

• 14
• 0
• 2
• 9
• 1
• 0
• 1
• 1