Федэральны суд ЗША прыпыніў тарыфы Трампа і забараніў уводзіць новыя. У Белым доме назвалі гэта «нязначнай перашкодай»
29 траўня федэральны суд ЗША пастанавіў, што Дональд Трамп перавысіў свае паўнамоцтвы, калі ўвёў шырокамаштабныя імпартныя тарыфы, якія закранулі як буйныя кампаніі, так і звычайных амерыканцаў. Суд спыніў дзеянне гэтых тарыфаў, уключаючы «святочныя» тарыфы, абвешчаныя 2 красавіка, і забараніў уводзіць новыя, піша «Еўрапейская праўда».
Асобна суд забараніў прымяняць тарыфы, якія раней былі ўведзеныя супраць Кітая, Мексікі і Канады — якія нібыта мелі мэту барацьбы з кантрабандай фентанілу.
Рашэнне вынес Міжнародны гандлёвы суд ЗША на Манхэтэне па пазове праваабарончай арганізацыі Liberty Justice Center, якая прадстаўляла інтарэсы малых бізнэсаў. Суд палічыў, што Трамп не меў права ўводзіць тарыфы без згоды Кангрэса, нават калі спасылаўся на закон аб надзвычайных эканамічных паўнамоцтвах (IEEPA), бо гэты закон не прадугледжвае выкарыстанне тарыфаў як меры рэагавання.
Суд даў 10 дзён для выканання пастаяннай судовай забароны. Трамп ужо падаў апеляцыю, і справа, верагодна, дойдзе да Вярхоўнага суда. У выніку канчатковае рашэнне пакуль застаецца нявызначаным, а барацьба вакол тарыфаў працягваецца.
Тым часам Белы дом выступіў з рэзкай крытыкай рашэння. Прэс-сакратар заявіў, што «суды не павінны вырашаць, як дзейнічаць падчас крызісу», а дарадца Трампа Стывен Мілер назваў гэта «судовым пераваротам, які выйшаў з-пад кантролю».
Адміністрацыя Трампа дае зразумець, што не збіраецца адмаўляцца ад сваіх планаў.
Кіраўнік Нацыянальнай эканамічнай рады Кевін Хасэт 29 мая назваў судовае рашэнне «нязначнай перашкодай», якую стварылі «суддзі-актывісты». Ён заявіў, што тарыфная стратэгія Трампа ўжо прыносіць плён: краіны пачалі адкрываць свае рынкі для амерыканскіх тавараў і зніжаць гандлёвыя бар’еры. Калі ж гэтага не адбудзецца, яны мусяць чакаць новых тарыфаў.
Хасэт таксама не пагадзіўся з высновамі суда пра перавышэнне прэзідэнцкіх паўнамоцтваў. Ён сцвярджае, што крызіс з фентаніламі ў ЗША — гэта рэальная надзвычайная сітуацыя, якая апраўдвае дзеянні прэзідэнта.
Нягледзячы на магчымую паразу ў апеляцыі, у Белым доме заяўляюць, што маюць іншыя юрыдычныя інструменты, каб працягнуць тарыфную палітыку. Паводле Хасэта, адміністрацыя разлічвае, што апеляцыя ўсё ж пакіне тарыфы ў сіле, каб дасягнуць дамоўленасцяў з партнёрамі — магчыма, ужо да ліпеня.
Іншыя прадстаўнікі адміністрацыі таксама выступілі з рэзкай крытыкай суда. Намеснік прэс-сакратара Белага дома Куш Дэсаі заявіў, што «невыбраныя суддзі не павінны вырашаць, як дзейнічаць у крызіс», а дарадца Трампа Джэйсан Мілер назваў рашэнне суда «выбрыкам глыбіннай дзяржавы».
Ілан Маск выступіў з вострай крытыкай новага закона, прапанаванага Трампам
Трамп прапанаваў Канадзе доступ да абароны пад «Залатым купалам». Пры адной умове
Трамп адклаў увядзенне 50-працэнтных пошлін на тавары з ЕС да ліпеня
Міністр абароны Германіі падчас візіту ў ЗША запатрабаваў адмяніць пошліны для ЕС
ЗША і Кітай пачалі перамовы аб разрадцы «гандлёвай вайны»
Цяпер чытаюць
Што ўяўляе сабой база даных, якую сілавікі называюць «узломам «Новай Беларусі»8
Каментары