На Свіслачы 22 і 23 мая прайшлі заезды на не самых звыклых для беларускага вока лодках. Непадалёк ад станцыі метро «Няміга» на старт выйшлі «драконы» — 20-мясцовыя кітайскія каноэ, піша Tochka.by.
Першымі новы від транспарту змаглі апрабаваць студэнты БДЭУ і Інстытута грамадзянскай абароны МНС. Акрамя іх, у спаборніцтвах прынялі ўдзел прадстаўнікі іншых ВНУ Беларусі.
Спаборніцтвы на гэтых кітайскіх лодках вельмі нязвыклыя беларускаму гледачу, хоць сам па сабе від спорту налічвае даволі доўгую гісторыю.
Яго галоўная асаблівасць — колькасць весляроў у лодцы (10 або 20), якія сядзяць па двух яе бартах і разганяюць свой карабель вёсламі. Для таго каб уся гэтая група спартсменаў дзейнічала сінхронна, у лодцы знаходзіцца бубнач, які адстуквае неабходны яго камандзе тэмп. Акрамя таго, яшчэ адным удзельнікам заезду з'яўляецца рулявы, які пры дапамозе адмысловага прыстасавання на карме задае кірунак руху лодкі.
Спаборніцтвы «драконаў» праводзяцца на дыстанцыях ад 200 да 2000 метраў і ўваходзяць у праграму Сусветных гульняў — чэмпіянату, які аб'ядноўвае неалімпійскія віды спорту.
Хутка па гэтым відзе пройдзе чэмпіянат Еўропы. Пакуль на нашых водных прасторах асвойваецца новы від спорту, прадстаўнікі больш знаёмых з «драконам» камандаў рыхтуюцца да еўрапейскага форуму. Вялікі турнір адбудзецца ў Італіі з 4 па 7 чэрвеня 2025 года.
Начальнік міліцыі Брагіна страляў у сваю жонку. Яна цудам выжыла9
Каментары