Да канца года хворых на дыябет перавядуць на картрыджную форму інсуліну
Да канца года ўсіх пацыентаў з цукровым дыябетам у Беларусі перавядуць на выкарыстанне інсуліну ў картрыджах. Пра гэта паведаміла галоўны пазаштатны эндакрынолаг Міністэрства аховы здароўя, намесніца галоўнага доктара Рэспубліканскага цэнтра медыцынскай рэабілітацыі і бальнеалячэння Вольга Салко.
Паводле слоў Вольгі Салко, за апошнія пяць гадоў значна палепшылася якасць дапамогі людзям з першым тыпам дыябету: актыўна развіваліся школы дыябету, паляпшаліся метады кантролю за хваробай, а таксама змяняліся падыходы да забеспячэння лекамі.
Усе дзеці і дарослыя з першым тыпам дыябету ўжо выкарыстоўваюць сучасныя генаінжынерныя інсуліны ў картрыджах, а цяпер на такую форму паступова пераводзяць і людзей з другім тыпам.
Асаблівую ролю ў гэтым адыгрывае беларускі вытворца — прадпрыемства «Белмедпрэпараты», якое асвоіла выпуск інсуліну ў картрыджах. Гэта дазваляе забяспечваць патрэбы пацыентаў з уласных рэсурсаў.
Таксама пашыраюцца магчымасці кантролю ўзроўню цукру ў крыві. Акрамя звычайных глюкаметраў, усё шырэй выкарыстоўваюцца сістэмы бесперапыннага маніторынгу глікеміі.
Што тычыцца іншых эндакрынных хвароб, напрыклад паталогій шчытападобнай залозы або рэдкіх захворванняў, такіх як праблемы гіпофізу ці дэфіцыт гармону росту, то і тут, паводле слоў Вольгі Салко, дзяржава забяспечвае неабходнае лячэнне. Як яна сцвярджае, закупляюцца дарагія лекі, каб забяспечыць імі ўсіх, хто мае патрэбу.
Брат беларускай каралевы прыгажосці трапіў у рэанімацыю ў Азербайджане2
Каментары