«Шыкоўны рэстаран №1». Як выглядае абноўленая сталовая гарвыканкама ў Брэсце
Блогерка паказала інтэр’еры гарвыканкамаўскай сталоўкі, якая больш нагадвае рэстаран. Вось колькі каштуе там паабедаць.
Тыктокерка Таццяна Максімук разам з мужам наведала абноўленую сталовую брэсцкага гарвыканкама.
«Дарэчы, яны сябе пазіцыянуюць як рэстаран №1 у Брэсце», — заўважае жанчына.
Сапраўды сталовая выглядае не вельмі звычайна для такіх месцаў у Беларусі: прыемны рамонт, жырандолі з намёкам на шык, белыя абрусы з дарожкамі. Але блогерку больш за ўсё ўразілі камфортныя крэслы.
Канечне, кветкі на сталах стаяць пластыкавыя, але ўсё ж не такія жудасныя, якія традыцыйна ставяць у беларускіх сталоўках.
Затое цэны вельмі прыемныя: супы ад 1,30 да 2,30 рубля, бульбяное пюрэ — 2 рублі, рыс — 1 рубель. Катлета «Папараць-кветка» — 2,10, адварны язык — 5,90, філе хека ў сыры — 4,90, філе птушкі, запечанае з памідорамі, — 2,80 рубля.
Знакамітае кобрынскае марожанае прадаюць па 3 рублі за 100 грам.
Тыктокерка заплаціла за свой абед 6,5 рубля: яна брала салату, пірожнае «Кошык бялковы» і марожанае з топінгам. А абед мужа абышоўся сямейнаму бюджэту менш за 10 рублёў. Ён браў боршч, пюрэ, філе птушкі з памідорамі, хлеб, кефір, пірожнае «Бульбачка» і гарбату.
Некалькі разоў Таццяна падкрэслівае, што ў сталовую гарвыканкама можна трапіць без пашпарта. Рэч у тым, што ў Брэсце ў сталовай аблвыканкама ў наведвальнікаў просяць прадэманстраваць пашпарт (кажуць, што толькі ў першы раз — бо далей унясуць у сваю базу і можна будзе ўжо хадзіць без дакументаў).
Каментары