Мэр Кіева — першы з украінскіх топ-палітыкаў, хто публічна дапусціў, што краіне, магчыма, давядзецца саступіць тэрыторыі, хай і часова.
Віталь Клічко заявіў Бі-бі-сі, што Украіне, магчыма, давядзецца аддаць частку тэрыторый у межах мірнага пагаднення з Расіяй на фоне росту ціску з боку прэзідэнта Дональда Трампа прыняць тэрытарыяльныя саступкі.
«Адзін з варыянтаў —… аддаць тэрыторыю. Гэта несправядліва. Але дзеля міру, часовага міру, магчыма, гэта можа быць рашэннем, часовым», — сказаў ён.
Аднак 53-гадовы былы чэмпіён свету па боксе, які стаў палітыкам, падкрэсліў, што украінскі народ «ніколі не прыме акупацыю» Расіяй.
Ён выказаўся праз некалькі гадзін пасля ракетна-дронавай атакі Расіі на Кіеў, у выніку якой загінулі 12 чалавек і больш за 80 атрымалі раненні. Гэта была адна з найбольш смяротных расійскіх атак на ўкраінскую сталіцу за апошнія месяцы.
Клічко адзначыў, што ён «адказвае за сталіцу Украіны», назваўшы яе «сэрцам» знясіленага вайной краю. Ён сказаў, што прэзідэнту Уладзіміру Зяленскаму, магчыма, прыйдзецца пайсці на «балючае рашэнне» дзеля дасягнення міру.
Мэр Кіева цяпер з'яўляецца адным з найбольш высокапастаўленых украінскіх палітыкаў, і ён першы, хто публічна дапусціў, што краіне, магчыма, давядзецца саступіць тэрыторыі, хай і часова.
На пытанне, ці абмяркоўваў з ім Зяленскі падрабязнасці магчымага пагаднення, Клічко адказаў проста: «Не».
«Прэзідэнт Зяленскі займаецца гэтым сам. Гэта не мая функцыя», — дадаў ён.
Клічко і Зяленскі з’яўляюцца палітычнымі апанентамі. Мэр неаднаразова абвінавачваў прэзідэнта і яго каманду ў спробах падарваць яго аўтарытэт.
Успамінаючы пра публічную сварку паміж Зяленскім і Трампам у Белым доме ў лютым, мэр выказаў меркаванне, што ключавыя пытанні паміж топ-палітыкамі лепш абмяркоўваць «без відэакамер».
Цяпер чытаюць
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга145
Каментары
Теперь, этот раздрай, выгоден старому-новому союзу трампа и путина.
И трамп, и путин будут довольны.