«Самі прыбіраюць, забяспечваюць, не трэба ні пра што думаць». Беларуска год сустракаецца з пакістанцам — дзеліцца ўражаннямі
На фоне запрашэння Лукашэнкам у Беларусь да 150 тысяч працоўных мігрантаў з Пакістана ў сеціве многія выказваюць трывогу наконт такой ініцыятывы. Прапагандысты ўжо пачалі супакойваць народ, пагражаючы нават крымінальнай адказнасцю за распальванне міжнацыянальнай варажнечы. На абарону пакістанцаў стала і беларуска Злата Кіслова: дзяўчына ўжо больш за год жыве з пакістанцам і кажа, што вельмі задаволеная.
Злата не першы месяц вядзе тыкток пра жыццё і стасункі з хлопцам-пакістанцам. У сувязі з апошнімі навінамі блог атрымаў дадатковую порцыю ўвагі. Дзяўчына нават запісала некалькі спецыяльных відэа ў абарону нацыі, прадстаўніком якой з’яўляецца яе бойфрэнд.
«У Беларусь прыязджае 150 тысяч пакістанцаў, і многія дзяўчаты пачынаюць ужо баяцца, кажуць, што трэба насіць з сабой пярцоўкі. А я вось больш за год жыву з пакістанцам, і гэта ўсё класна. Яны самі прыбіраюць, гатуюць, забяспечваюць, і не трэба ні пра што думаць», — каментуе Злата. «Пакістан — рэлігійная краіна, але жанчынам там дакладна няма чаго баяцца. У пакістанцаў сям'я на першым месцы, і яны зробяць усё дзеля сям'і. Насамрэч неістотна, якая нацыя, галоўнае, каб людзі добрыя былі. Я заўсёды гэта казала і буду казаць».
Зэйн жыве ў Беларусі дзевяць гадоў з моманту, як прыехаў сюды вучыцца. Са Златай яны пазнаёміліся ў інтэрнэце: хлопец напісаў першым.
«Месяц мы толькі перапісваліся. Але ўжо пасля першай сустрэчы сталі часцей бачыцца, а пасля і жыць разам».
Злата расказвае, як кожны з іх адкрывае для іншага культуру і традыцыі свайго народа. Так, Зэйна ў свой час, напрыклад, моцна здзівіла, як у Беларусі хлопцы лёгка камунікуюць з дзяўчатамі, бо на яго радзіме з незнаёмкамі размаўляць забаронена, і нават школы — асобныя для кожнага полу. Сваю ж будучую жонку яны могуць не ведаць аж да дня вяселля.
Злату ж больш за ўсё здзівіла, навошта хлопцу спатрэбілася пластыкавая бутэлька ў туалеце.
«Аказваецца, бутэлька патрэбная, каб падмыцца. Яны аддаюць перавагу вадзе, а не туалетнай паперы, як мы. Увогуле, я лічу, што мусульмане — самыя ахайныя людзі. На спатканні Зэйн нават збіраецца даўжэй, чым я, таму што яму заўсёды трэба выглядаць на ўсе сто».
Злата — каталічка, але яна не посціцца, Зэйн жа як мусульманін імкнецца жыць па правілах у Рамадан.
«Я вырашыла паэксперыментаваць і таксама не есці і не піць, як звычайна, хаця б адзін дзень. Наша раніца пачалася ў 5.30, пасля быў сахур, потым Зэйн памаліўся і мы пайшлі далей спаць. У восем раніцы мы прачнуліся і пайшлі на працу. Да 14.00 я была спакойная і нічога не ела і не піла ваду. Думала, што не вытрымаю, але ўсё ж дачакалася 19.00, калі мы разам паелі, і была яшчэ нават не галодная», — распавяла тыктокерка пра Рамадан у інтэрнацыянальнай пары.
Маладыя часта здзіўляюць адно аднаго невядомымі рэцэптамі. Так, Злата неяк зварыла для Зэйна кісель. А ён песціць яе ўлюбёнай пакістанскай стравай — курыцай са шпінатам (свініна, вядома, у доме — табу).
За час разам са Златай Зэйн змяніў многае ў сваіх звычках дзеля каханай: так, ён стаў святкаваць 8 Сакавіка і іншыя беларускія святы. Мужчына пачаў дарыць Злаце падарункі, хаця для яго гэта быў звычайны дзень.
Дзяўчына кажа, што многія яе адгаворвалі ад стасункаў з замежнікам, маўляў, нічога добрага тут не выйдзе. Але яна адчувае сябе шчаслівай разам з Зэйнам.
«Усе хатнія справы мы дзелім напалову. У маёй сям’і яны ўсе былі на маці, мне ж, я лічу, моцна пашанцавала», — хваліцца Злата.
Цяпер чытаюць
Колькі сёлета трацілі на вяселлі ў Беларусі? Сабралі рэальныя лічбы тых, хто пабываў у ЗАГСе1
Каментары