Шарэнда-Панасюк: Недапушчальна ствараць з людзей, якія трымаюцца за кратамі, нейкіх недавумкаў
Былая палітзняволеная Паліна Шарэнда-Панасюк у інтэрв'ю «Еўрарадыё» заклікала не абясцэньваць ахвярнасць прынцыповых палітвязняў.
Паліна Шарэнда-Панасюк лічыць, што ісці на кампраміс з рэжымам — гэта праява слабасці, якая толькі ўзмацняе яго пазіцыі і дазваляе працягваць сваю палітыку:
«Вы мусіце разумець, што ёсць пэўныя межы. Не першы раз гэтая сітуацыя з закладнікамі. Колькі можна гэтым глупствам займацца? Трэба зразумець, што рэжым прызвычаіўся да такой сітуацыі. Нешта адбываецца, набіраюцца закладнікі. Пачынаецца гандаль: «Раз яны ідуць нам на саступкі, значыць мы моцныя, а яны слабыя, таму што слабыя ідуць на саступкі».
Мы слабыя з боку гледжання гэтага рэжыму, таму што мы гатовыя ісці на саступкі. На якія саступкі пайшоў Лукашэнка? Што ён зрабіў? У нас правяліся нармальныя выбары а не гэты чарговы фарс? Значыць, у 2030 годзе зноў паўторыцца сітуацыя? Колькі можна?»
Па словах Паліны, спробы дамовіцца абражаюць тых, хто чатыры гады трымаецца ў цяжкіх умовах, не згаджаючыся на напісанне прашэння аб памілаванні.
Яна сцвярджае, што змаганне павінна працягвацца да канца, інакш ахвяры аказваюцца марнымі:
«Ну проста гэта ўжо глупства з майго пункту гледжання і непавага і да саміх сябе і да тых людзей, якія трымаюцца чатыры гады ў жудасных умовах. Для іх вось гэтыя паводзіны «давайце дамаўляцца з Лукою» сапраўды ўспрымаюцца як здрада. Атрымліваецца, мы дарэмна пакутавалі. Мы маглі выйсці адразу падпісаўшы. Але мы пакутуем, таму што мы хочам ісці да канца. Ахвяруем сабою для таго, каб даціснуць гэты рэжым».
Аднак частка палітзняволеных не гатовы да такой самаахвярнасці і хоча выйсці на волю. Яны выступаюць за пошукі кампрамісаў і перамовы. Адносна гэтага Паліна Шарэнда-Панясюк заўважае:
«Як паступаць у гэтай сітуацыі — індывідуальны выбар кожнага. Чалавек мае права падпісаць гэта [прашэнне аб памілаванні]. Але чалавек мае права і не падпісаць. Я лічу, што гэта вельмі дрэнна, што людзі, якія трымаюцца, якія адмаўляюцца ісці на саступкі рэжыму, выстаўляюцца нейкімі упёртымі, дурнямі.
Атрымліваецца, што гэтыя «мудрыя», яны падпісалі, яны выйшлі. А вось гэтыя…. Ці ім там падабаецца, ці што. Вось яны сядзяць. Ну і няхай сядзяць тады. А мы хітрыя, мы выйшлі.
Ствараць з тых людзей, якія трымаюцца, нейкіх недавумкаў я лічу недапушчальным. Трэба паважаць і пазіцыю гэтых людзей, разумець, чаму яны гэта робяць. Пагатоў, сітуацыя гэтая не другі і не трэці раз паўтараецца».
Каментары
А воз і ныне там. Лукашэнка як сядзеў на троне, так і сядзіць. Яшчэ і вайсковыя базы расейскія афіцыйна дазволіў размясціць.