Узброеныя сілы Украіны пад націскам расійскіх войскаў пакінулі горад Часаў Яр, важны для ўкраінскай абароны на Данбасе, паведамляе выданне The Moscow Times, спасылаючыся на пяць незалежных адна ад адной вайсковых і ўрадавых крыніц ва Украіне і Еўропе.
Горад, які займае стратэгічнае становішча, амаль год трымаўся пад безупыннымі атакамі расійскай арміі. Хоць ні Украіна, ні Расія афіцыйна пакуль не пацвердзілі ўзяцце горада, крыніцы The Moscow Times на месцах паведамляюць, што ўкраінскія войскі выцесненыя на яго ўскраіны.
Украінскі вайсковец, які гаварыў на ўмовах ананімнасці, пацвердзіў падзенне горада, сказаўшы: «Так, так яно і ёсць».
«Усе дарогі ў горад і з яго, па якіх ідзе забеспячэнне, падвяргаюцца інтэнсіўнай бамбардзіроўцы», — сказала іншая крыніца, маючы на ўвазе абстрэлы подступаў да Часавага Яра на захадзе.
Часаў Яр, які знаходзіцца на ўзвышшы, быў апошнім буйным рубяжом абароны на шляху да Канстанцінаўкі і Дружкоўкі і далей — да буйных гарадоў Краматорск і Славянск. Яны з'яўляюцца ключавымі мэтамі Масквы ў яе намаганнях па захопу ўсёй тэрыторыі Данецкай вобласці.
Першыя атакі на Часаў Яр пачаліся ў сярэдзіне мінулай вясны. Да 21 красавіка расійскія войскі захапілі размешчанае непадалёк сяло Багданаўка, а да сярэдзіны кастрычніка прарвалі лінію абароны на паўднёвым усходзе горада. Праз месяц яны дасягнулі цэнтра; нягледзячы на контратакі абаронцаў Часавага Яра, расійскія войскі працягвалі прасоўвацца, асабліва на поўначы, і да канца снежня кантралявалі ўжо большую частку горада.
У панядзелак паведамлялася пра цяжкія баі ў заходніх раёнах.
«Расіяне ў цэнтры горада; калі хто з украінцаў і застаўся, то гэта апошнія ачагі супраціву на ўскраінах», — сказала The Moscow Times трэцяя крыніца са спасылкай на шматлікія паведамленні вайскоўцаў.
З даваеннага насельніцтва ў 12 000 да сярэдзіны лістапада мінулага года ў Часавым Яры заставалася ўсяго 304 жыхары. Эвакуацыя была моцна абцяжараная праз пастаянныя абстрэлы.
Жахлівыя ФОТА з Часавага Яру. Так выглядае гэты горад, за які цяпер ідуць баі
Часаў Яр. Чаму расіянам так важна захапіць гэты горад
Кепскі мір ці зацяжная вайна. Як Украіна рыхтуецца да таго, што Трамп паспрабуе адразу пасадзіць яе за стол перамоваў
Апошні рывок. Што будзе гэтай зімой на полі бою ва Украіне?
Цяпер чытаюць
Адвакат Дзмітрый Лепрэтар расказаў пра белыя плямы ў справе аб тэракце ў метро9
Каментары