«Шугануць Берлін ды іншых еўрапейцаў». Пуцінскі «Арэшнік» можа быць толькі зрэжысіраваным шоу

Са слоў крыніц, у падрыхтоўцы аперацыі, мэтай якой было запалохаць заходніх палітыкаў і грамадзян, якія паступова страчваюць страх перад ядзернымі пагрозамі з Масквы, бралі ўдзел крамлёўскія піяршчыкі.

«Былі мазгавыя штурмы на тэму, чым адказаць і як асадзіць амерыканцаў і англічан за іх дазвол Зяленскаму выкарыстоўваць дальнабойную зброю. І як шугануць Берлін ды іншых еўрапейцаў, каб было непанадна», — сказаў расійскі чыноўнік.

У выніку была распрацавана класічная ваенная прапагандысцкая кампанія з мэтай выклікаць перабольшаныя ўяўленні пра здольнасці расійскага вайскова-прамысловага комплексу.

«У гэтым шоу, якое было зрэжысіраванае і выстаўленае публіцы, было некалькі этапаў. Галоўныя з іх — само нанясенне ўдару «Арэшніка», распаўсюджванне кадраў у сацыяльных сетках і замежных СМІ», — сказаў іншы расійскі чыноўнік.

Удзельнікамі шоу сталі ў тым ліку прэс-сакратарка МЗС Марыя Захарава і куратар СМІ ў Крамлі Аляксей Громаў. Апошні патэлефанаваў Захаравай проста падчас брыфінгу з замежнымі журналістамі і па гучнай сувязі забараніў «каментаваць удар балістычнымі ракетамі» па вайсковым заводзе ва ўкраінскім Дняпры.

«Гэтым трукам з нібыта званком Громава асабліва ганарыліся некаторыя ўдзельнікі мазгавых штурмаў», — сказаў расійскі чыноўнік. Ён назваў гэта і «пасхалкай» для расійскіх журналістаў, якім «добра вядомыя практыкі Аляксея Аляксеевіча [Громава]».

Кульмінацыяй кампаніі запалохвання стаў асабісты выступ Уладзіміра Пуціна з трыбуны саміту краін-членаў Арганізацыі Дамовы аб калектыўнай бяспецы, дзе расійскі прэзідэнт выхваляўся характарыстыкамі ракеты, сцвярджаючы, што яна не мае аналагаў і параўнальная па моцы з ядзернай.

«Саміт быў прысвечаны праблемам краін-членаў. Аднак публічна начальнік [так расійскія чыноўнікі паміж сабой часта называюць прэзідэнта] фактычна цалкам перахапіў парадак дня і выкарыстаў яго для пагрозы саюзнікам Зяленскага», — сказаў чыноўнік, знаёмы з падрыхтоўкай працы саміту.

«Я падазраю, што для іншых удзельнікаў саміту, кіраўнікоў дзяржаў АДКБ, тое, пра што і ў якім рэзкім фармаце выступіць начальнік, стала сюрпрызам. Загадзя іх пра гэта не інфармавалі. А самі яны па сутнасці сталі гарнірам для нашай асноўнай стравы — акту псіхалагічнай вайны супраць Захаду», — дадаў чыноўнік.

Аднак праблема Масквы палягае ў тым, што Расія не валодае істотным запасам сістэм «Арэшнік», і нават асабіста Пуцін у сваёй прамове прызнаў, што ўдар па Дняпры быў выпрабавальным выкарыстаннем.

Расійскай прамысловасці, улічваючы бюракратычную цяганіну і адставанне ў інавацыях, характэрныя для абароннага сектара, спатрэбяцца гады, каб выйсці на масавую вытворчасць «Арэшніка», расказаў The Moscow Times інжынер з вопытам працы ў Мінабароны на ўмовах ананімнасці.

«Нават адносна простыя праекты, не звязаныя з ракетамі, могуць займаць ад пяці да сямі гадоў на распрацоўку, — дадаў інжынер. — Гэты ўдар па Украіне, падобна, стаў першым выпрабаваннем [»Арэшніка»]. Даных для апраўдання запуску ў масавую вытворчасць пакуль недастаткова».

Інжынер адзначыў, што ў расійскім арсенале ўжо ёсць ракеты з характарыстыкамі, падобнымі да «Арэшніка», такія як яго базавая мадэль РС-26 «Рубеж», і выказаў здагадку, што раптоўнае выкарыстанне эксперыментальнай зброі ў рэальным баі можа быць хутчэй спробай паўплываць на грамадскую думку, чым дэманстрацыяй новых ваенных магчымасцяў.

• 2
• 1
• 24
• 3
• 0
• 0
• 2
• 0