«Мы з вамі не па чутках ведаем, што такое культура ў нашай краіне». Што гаварылася на прадстаўленні новага міністра культуры

Петрышэнка ў сваім выступленні адмыслова падкрэсліваў, што новы міністр не мае ніякага чыноўніцкага кіраўнічага вопыту, прыйшоў ён, маўляў, «з асяроддзя». У беларускай практыцы Петрышэнка не мог такога ўспомніць. І хоць з расійскай і ўкраінскай практыкі ён прыклады міністэрскай кар'еры людзей «з асяроддзя» прыгадаў, па агульнай танальнасці выказванняў адчувалася, што Чарнецкі наўрад ці той чалавек, якога на гэтай пасадзе хацеў бы сам Петрышэнка. 

У Чарнецкага, як віцэ-міністр адзначыў, «шмат сыграных роляў», але цяпер у яго такая роля, якая найважнейшая і ключавая, якую трэба «пражыць, гэта не роля, як трэба сапраўды сыграць па-сапраўднаму». Новы міністр мусіць рэалізаваць пастаўленыя задачы, культура абсалютна не можа «на нейкім асобным трэку стаяць», і «куды ні паглядзі, мы без культуры не можам рэалізоўваць абсалютна любыя праекты». Асабліва Петрышэнка следам за Лукашэнкам пажадаў Чарнецкаму падняць на вяршыні, якіх чакаюць гледачы, беларускі кінематограф. 

Павялічыць

У адказ Руслан Чарнецкі адзначыў, што «мы з вамі не па чутках ведаем, што такое культура ў нашай краіне».

Маўляў, да яго праца была праведзеная настолькі каласальная, што ён, шмат ездзячы па расійскіх фестывалях, адно толькі там і чуе хваласпевы: «Такіх водгукаў я нідзе ні ад каго не чуў, наконт таго, што нас бы яшчэ і ў прыклад ставіць».

«У нас ёсць чаму павучыцца. Я шмат бачу, шмат адглядаю, са многімі камунікую. Нас вельмі любяць, нас вельмі чакаюць, з нас бяруць прыклад, як я ўжо казаў», — напоўніцу трансляваў аптымізм новы міністр.

Пасля чаго даволі нечакана прагучала наступная фраза, з якой вынікае, што ўсе папярэднія хвалебныя словы былі сказаныя авансам:

«Таму цяпер мы павінны стаць гэтым прыкладам. Вось такое маё самае галоўнае пажаданне, самы галоўны сцяг, ці як, да якога мы будзем з вамі імкнуцца».

Пасля Петрышэнка гаварыў яшчэ пра тое, што рашэнне накіраваць Чарнецкага менавіта ў сферу культуры прынята «ў няпросты час». Але і папярэднікі, маўляў, не сядзелі склаўшы рукі:

«Мы па ўсіх кірунках, якія знаходзяцца, якія ёсць у сферы вядзення міністэрства, актыўна, прадуктыўна, грунтоўна адпрацоўвалі. Задзел ёсць. Важна, каб гэты наш лакаматыў менавіта культурнага складніка рухаўся на тых параметрах і на тых абаротах, якія патрэбныя нашаму грамадству, нашай краіне, нашым людзям».

Большую частку часу, пакуль гучала гэта тырада, камера была накіраваная на ўжо былога міністра культуры Анатоля Маркевіча, які, стоячы побач з Петрышэнкам і Чарнецкім, бесперапынна ўхвальна ківаў на кожнае сказанае віцэ-прэм'ерам слова. А той урэшце сказаў пару добрых слоў і пра персанальна Маркевіча:

«Анатоль Мечыслававіч, так, шмат было пэўных спрэчак, але заўсёды мы знаходзілі развязку, заўсёды рухаліся, напрамак дзейнасці ўсіх творчых калектываў, яны былі менавіта на чаканы вельмі патрэбны і важны канцавы вынік».

У цэлым з апублікаваных відэа складваецца ўражанне, што Петрышэнка не мае да новага міністра асаблівых сантыментаў і паміж імі існуе пэўнае напружанне. 

• 0
• 1
• 7
• 3
• 0
• 0
• 2
• 0