Афіцыянт, танцор у Тайландзе, ролі ў «Мухтары» і «Сватах». Пяць фактаў пра новага міністра культуры Чарнецкага
43-гадовага акцёра Руслана Чарнецкага прызначылі новым міністрам культуры. У яго біяграфіі ёсць усё — ад жыцця ў Тайландзе да выступу на Марафоне адзінства.
Вучыўся на аўтаслесара і быў танцорам у Тайландзе
Акцёру 43 гады. Ён нарадзіўся ў Мінску і з дзяцінства займаўся спортам і творчасцю — плаванне, бокс, тэатральны гурток, КВЗ, гітара, бальныя танцы. Сям'я жыла на вуліцы Цнянскай. У Руслана ёсць сястра, старэйшая за яго на 12 гадоў.
«Ціхонем я ніколі не быў, на мне заўсёды скура гарэла, у пачатковай школе біўся ледзь не штодня», — расказваў будучы міністр у інтэрв'ю.
Аднак размовы пра кар'еру артыста спачатку не было. Чарнецкі адвучыўся ў ПТВ на аўтаслесара. Але па прафесіі не працаваў — прызвалі ў армію. Пасля вырашыў быць афіцыянтам — нават скончыў адпаведныя курсы. А ўрэшце знайшоў сябе як танцор-бальнік, выступаў па кантракце ў Тайландзе. Ён пражыў у азіяцкай краіне два з паловай гады.
Пасля вырашыў зарабляць на другасных ролях у расійскіх серыялах. Прыехаў на кастынг у Маскву, але пазнаёміўся там з беларускімі артыстамі. Яны паклікалі Руслана на свой спектакль у Мінск. Завязалася знаёмства, якое і вярнула Чарнецкага на радзіму.
Тады ж ён паступіў у Беларускую дзяржаўную акадэмію мастацтваў — на завочнае аддзяленне. Вучыўся на курсе ў вядомай актрысы Зоі Белахвосцік. Былая прыма Купалаўскага тэатра пакінула тэатр на знак пратэсту ў 2020-м, Чарнецкі ж застаўся верны сістэме.
Зняўся ў кучы расійскіх серыялаў
З 2005 года Чарнецкі выступае ў Нацыянальным драматычным тэатры імя Максіма Горкага. Ён адзін з вядучых артыстаў там. Летась за ролю Эдмона Дантэса ў спектаклі «Граф Монтэ-Крыста» ён атрымаў Нацыянальную тэатральную прэмію ў намінацыі «Найлепшая мужчынская роля».
Зняўся больш як у 110 беларускіх і расійскіх фільмах і серыялах. Ён быў амаль паўсюль — «Код Каіна», «Сваты 7», «Мухтар. Новы след», «Каменская — 5». Адзначыўся і ў нядаўняй прапагандысцкай стужцы Беларусьфільма «На іншым беразе», створанай на заказ дзяржавы, каб выкрыць жахі польскага прыгнёту ў Заходняй Беларусі.
Чарнецкі здымаўся нават у стужцы «Купала», якая так і не выйшла ў пракат. Там ён сыграў аднаго з айцоў БНР Антона Луцкевіча.
Мае медаль Францыска Скарыны і званне заслужанага артыста Беларусі. І плануе застацца на сцэне і на пасадзе міністра.
Акцёр вядзе таксама праграму «Наше утро» на АНТ.
З жонкай пазнаёміўся на здымках
У другім шлюбе новы міністр культуры сышоўся з мастачкай па грыме Настассяй Чарнецкай. Яны пазнаёміліся на здымках кіно. Розніца ва ўзросце — сем гадоў.
Гадуюць 9-гадовую дачку. Дзяўчынка з трох гадоў здымаецца ў эпізадычных сцэнах у кіно, наведвае дзіцячую студыю пры Оперным тэатры.
Часты ўдзельнік праўладных канцэртаў
Чарнецкага — ростам 195 см — лёгка запомніць вонкава. Дый з праўладных мерапрыемстваў ён не вылазіць. Працуе як канферансье на ўсялякіх форумах у падтрымку Лукашэнкі, а цяпер актыўна ўдзельнічае ў канцэртах у рамках так званага Марафона адзінства.
Калег, якія выказалі пратэст рэжыму ў 2020-м, ён не разумее.
«Трэба быць удзячным, што дзяржава падтрымлівае тэатр. Такога няма за мяжой, там акцёрам цяжка. Дзякуючы савецкай сістэме рэпертуарнага тэатра ў артыстаў ёсць магчымасць творча развівацца і не думаць пра грошы, бо дзяржава падтрымае мастацтва ў любым выпадку», — казаў Чарнецкі на «СБ».
«Мы ж дастаткова добра жылі. Навошта табе забіваць галаву іншымі рэчамі?» — разважаў ён пра апанентаў у інтэрв'ю Марату Маркаву.
Паспеў пабыць дэпутатам
Акцёр паспеў амаль год нават пабыць дэпутатам Палаты прадстаўнікоў (яго прызначылі ў 2024-м), але цяпер перасядзе ў міністэрскае крэсла. Па беларускім заканадаўстве сумяшчаць гэтыя дзве пасады нельга.
Да яго міністрам культуры быў Анатоль Маркевіч. Ён доўгі час узначальваў Навагрудскі райвыканкам і не меў ніякага дачынення да культуры. Запомніўся фота з сёстрамі Груздзевымі і зачысткай дзеячаў культуры. Даносчыца Вольга Бондарава і іншыя прарасійскія актывісты пры гэтым лічылі яго недастаткова радыкальным. Пэўны час, каб абараняцца ад іх нападак, Міністэрства культуры нават вяло ананімны тэлеграм-канал, дзе выгароджвала Маркевіча і адказвала Бондаравай.
Бондаравай будзе складана: з аднаго боку, трэба наладжваць адносіны з новым міністрам. З другога — трэба адначасова змагацца з «амаральнымі» спектаклямі 18+ кшталту «Ночы для жанчын», у якіх граў сам міністр.
Каментары
...
ну навошта?
Ну, с аморальщиной, положим, следует усердно и сосредоточенно бороться, не покладая рук и не щадя живота своего. Всем миром! А то ведь разврат везде...