У Румыніі праходзяць парламенцкія выбары. Ёсць пабойванні, што прарасійскія сілы могуць займець поспех
1 снежня ў Румыніі праходзяць парламенцкія выбары. Грамадзяне выбіраюць сваіх прадстаўнікоў у двухпалатны парламент, які ўключае Палату дэпутатаў і Сенат.
Міжнародныя СМІ называюць гэтыя выбары «аднымі з самых важных» у сучаснай гісторыі Румыніі, піша «Радыё Свабода».
19 мільёнаў грамадзян Румыніі, якая ўваходзіць у Еўрасаюз і NATO, могуць скарыстацца сваім выбарчым правам.
Чакаецца, што ўльтраправыя і прарасійскія сілы краіны, якія атрымалі падтрымку на прэзідэнцкіх выбарах, могуць перамагчы і на парламенцкіх, паведамляе Румынская служба «Радыё Свабода».
Больш за 10 000 кандыдатаў зарэгістраваліся, каб змагацца за месцы ў двухпалатным парламенце — 329 месцаў у ніжняй палаце дэпутатаў і 136 месцаў у Сенаце. Сярод удзельнікаў выбараў зарэгістраваная 31 палітычная партыя, альянс і 19 арганізацый нацыянальных меншасцяў.
Апытанне AtlasIntel паказала, што ўльтраправы, ультранацыяналістычны Альянс за румынскае адзінства (AER) лідзіруе з падтрымкай 22,4%, трохі апярэджваючы кіроўную Сацыял-дэмакратычную партыю (SDP) з 21,4%.
AER займае антызаходнюю пазіцыю, ставячы пад сумнеў сяброўства Румыніі ў Еўрапейскім саюзе і NATO.
Для праходжання ў парламент палітычныя партыі павінны набраць не менш за 5% галасоў на нацыянальным узроўні. Палітычныя альянсы дзвюх партый павінны набраць 8%, альянсы трох партый — 9%, а альянсы чатырох і больш партый — 10%.
Нагадаем, нядаўна ў Румыніі праходзілі прэзідэнцкія выбары. У другі тур выйшлі прарасійска настроены Кэлын Джарджэску і Элена Ласконі ад ліберальнага Саюза выратавання Румыніі. Другі тур адбудзецца 8 снежня.
Цяпер чытаюць
Пра Мелказёрава ў яго апошні дзень: «Было адчуванне, што ён стомлены, бракуе энергіі, рысы твару былі запалыя»1
Каментары