Еўрасаюз рыхтуе больш суровыя санкцыі супраць Беларусі, але для калію могуць зрабіць выключэнне
Еўракамісія прапануе ўвесці больш суровыя санкцыі супраць Беларусі за падтрымку расійскай агрэсіі ва Украіну і такім чынам перашкодзіць абыходу санкцый, уведзеных раней супраць Расіі, піша «Радыё Свабода».
Еўрапейская камісія падрыхтавала праект рашэння, якое ўніфікуе санкцыі супраць Беларусі з тымі, якія ўжо дзейнічаюць датычна расійскіх кампаній за ваеннае ўварванне ва Украіну.
Як адзначаецца ў праекце рашэння, забарона дадаткова пашыраецца на пастаўкі ў Беларусь тавараў падвойнага прызначэння і тэхналогій з абавязковым уключэннем у кантракты з трэцімі краінамі ўмовы пра немагчымасць рээкспарту тавараў у Беларусь.
У прыватнасці, гаворка ідзе аб прадукцыі і тэхналогіях падвойнага прызначэння, якія можна выкарыстаць для нарошчвання прамысловага патэнцыялу Беларусі ў сферы абароны, бяспекі, авіяцыі і космасу.
Еўракамісія прапануе забараніць пастаўкі ў Беларусь навігацыйных тавараў і прадметаў раскошы, а таксама прамы або ўскосны імпарт, набыццё ці перадачу алмазаў з Беларусі, у тым ліку транзітам, непрамысловых прыродных і сінтэтычных алмазаў, ювелірных вырабаў з дыяментамі.
Праект рашэння прадугледжвае забарону на імпарт мінеральных прадуктаў, уключна з сырой нафтай, і ўводзіць новую забарону на экспарт тавараў і тэхналогій для выкарыстання ў нафтаперапрацоўцы і вытворчасці звадкаванага прыроднага газу.
У той жа час, каб пазбегнуць негатыўных наступстваў для харчовай бяспекі ў свеце, Еўракамісія прапануе пры тэрміновай неабходнасці трэціх краін дазволіць аператарам Еўрасаюза ўдзельнічаць у пастаўках сельскагаспадарчай і харчовай прадукцыі, у тым ліку пшаніцы і калійных угнаенняў з Беларусі для трэціх краін.
Гэтае выключэнне будуць рабіць у пэўных выпадках і аб’ёмах. Пры гэтым Еўракамісія абавязваецца публікаваць інфармацыю пра аб’ёмы, датычна якіх выключэнні будуць даступныя.
Адначасова прапануецца забараніць аказваць яшчэ некалькі відаў паслуг, у тым ліку кансультацыйныя, аўдытарскія, архітэктурныя, тэхнічныя, а таксама ІТ-паслугі і тыя, што звязаныя з бухгалтарскім і падатковым улікам.
Апроч таго, Еўракамісія разглядае ініцыятыву забараніць уезд у Еўрасаюз прычэпаў і паўпрычэпаў, зарэгістраваных у Беларусі, і пашырыць забарону для фінансавага сектару Беларусі — у прыватнасці на прыём дэпазітаў з Беларусі.
Спявачку Мэрыем Герасіменка на працягу двух гадоў збіваў муж43
Каментары