Jeŭrasajuz rychtuje bolš surovyja sankcyi suprać Biełarusi, ale dla kaliju mohuć zrabić vyklučeńnie
Jeŭrakamisija prapanuje ŭvieści bolš surovyja sankcyi suprać Biełarusi za padtrymku rasijskaj ahresii va Ukrainu i takim čynam pieraškodzić abychodu sankcyj, uviedzienych raniej suprać Rasii, piša «Radyjo Svaboda».
Jeŭrapiejskaja kamisija padrychtavała prajekt rašeńnia, jakoje ŭnifikuje sankcyi suprać Biełarusi z tymi, jakija ŭžo dziejničajuć datyčna rasijskich kampanij za vajennaje ŭvarvańnie va Ukrainu.
Jak adznačajecca ŭ prajekcie rašeńnia, zabarona dadatkova pašyrajecca na pastaŭki ŭ Biełaruś tavaraŭ padvojnaha pryznačeńnia i technałohij z abaviazkovym uklučeńniem u kantrakty z trecimi krainami ŭmovy pra niemahčymaść reekspartu tavaraŭ u Biełaruś.
U pryvatnaści, havorka idzie ab pradukcyi i technałohijach padvojnaha pryznačeńnia, jakija možna vykarystać dla naroščvańnia pramysłovaha patencyjału Biełarusi ŭ śfiery abarony, biaśpieki, avijacyi i kosmasu.
Jeŭrakamisija prapanuje zabaranić pastaŭki ŭ Biełaruś navihacyjnych tavaraŭ i pradmietaŭ raskošy, a taksama pramy abo ŭskosny impart, nabyćcio ci pieradaču ałmazaŭ ź Biełarusi, u tym liku tranzitam, niepramysłovych pryrodnych i sintetyčnych ałmazaŭ, juvielirnych vyrabaŭ z dyjamientami.
Prajekt rašeńnia praduhledžvaje zabaronu na impart minieralnych praduktaŭ, uklučna z syroj naftaj, i ŭvodzić novuju zabaronu na ekspart tavaraŭ i technałohij dla vykarystańnia ŭ naftapierapracoŭcy i vytvorčaści zvadkavanaha pryrodnaha hazu.
U toj ža čas, kab paźbiehnuć niehatyŭnych nastupstvaŭ dla charčovaj biaśpieki ŭ śviecie, Jeŭrakamisija prapanuje pry terminovaj nieabchodnaści trecich krain dazvolić apierataram Jeŭrasajuza ŭdzielničać u pastaŭkach sielskahaspadarčaj i charčovaj pradukcyi, u tym liku pšanicy i kalijnych uhnajeńniaŭ ź Biełarusi dla trecich krain.
Hetaje vyklučeńnie buduć rabić u peŭnych vypadkach i abjomach. Pry hetym Jeŭrakamisija abaviazvajecca publikavać infarmacyju pra abjomy, datyčna jakich vyklučeńni buduć dastupnyja.
Adnačasova prapanujecca zabaranić akazvać jašče niekalki vidaŭ pasłuh, u tym liku kansultacyjnyja, aŭdytarskija, architekturnyja, techničnyja, a taksama IT-pasłuhi i tyja, što źviazanyja z buchhałtarskim i padatkovym ulikam.
Aproč taho, Jeŭrakamisija razhladaje inicyjatyvu zabaranić ujezd u Jeŭrasajuz pryčepaŭ i paŭpryčepaŭ, zarehistravanych u Biełarusi, i pašyryć zabaronu dla finansavaha siektaru Biełarusi — u pryvatnaści na pryjom depazitaŭ ź Biełarusi.
Ciapier čytajuć
Pamior 50-hadovy śpiecnazaviec Bućko. Jon byŭ udzielnikam vykradańnia i zabojstva Zacharanki i Hančara16
Kamientary