Генпракурор распавёў, колькі «экстрэмісцкіх» злачынстваў налічыла яго ведамства з 2020 года
У Беларусі па-ранейшаму ідзе «праца па выяўленні і ліквідацыі арганізацый дэструктыўнай накіраванасці», а «калектыўны Захад працягвае спробы дэстабілізаваць абстаноўку ў Беларусі», заявіў на форуме генпракурораў краін ШАС генеральны пракурор Беларусі Андрэй Швед, перадае «Спутнік».
Генеральны пракурор Беларусі Андрэй Швед заявіў, што з 2020 года ў краіне зарэгістравалі больш за 16 тысяч злачынстваў «экстрэмісцкага» характару. Пад гэтым эўфемізмам хаваюцца справы палітычнага толку.
Як сказаў Швед, у Беларусі па-ранейшаму працягваюць выяўляць і ліквідаваць арганізацыі дэструктыўнай накіраванасці. Так лукашэнкаўцы называюць непадкантрольныя сабе ініцыятывы.
Паводле яго, больш за 70% злачынстваў «экстрэмісцкага» характару ўчынена з выкарыстаннем інфармацыйных тэхналогій, таму «інфармацыйнай прасторы сёння нададзеная асаблівая ўвага».
Па словах Шведа, колькасць экстрэмісцкіх злачынстваў у краіне «значна зменшылася і прадаўжае зніжацца, а грамадска-палітычная сітуацыя стабілізавалася».
Масавыя палітычныя рэпрэсіі ў Беларусі працягваюцца з 2020 года, калі выбары суправаджаліся нерэгістрацыяй і арыштамі праціўнікаў Лукашэнкі і назіральнікаў на выбарчых участках. Нягледзячы на гэта, Аляксандр Лукашэнка, мяркуючы са звестак з участкаў, дзе выбарчыя камісіі дазволілі назіральнікам сачыць за падлікам галасоў, прайграваў Святлане Ціханоўскай, але не аддаў улады.
З 2022 года, пасля нападу Расіі на Украіну, беларусаў пачалі пераследаваць і за антываенныя выказванні або сімпатыі да Украіны.
За гэты час у краіне адбылося не менш за 50 тысяч палітычна матываваных затрыманняў.
Каментары