YouTube абвясціў пра тэставанне на прыладах Android магчымасці пошуку песень, калі карыстальнік можа проста напець мелодыю.
YouTube абвясціў аб новым эксперыменце на прыладах Android, які вызначае песню з дапамогай напявання. Гэта выглядае сур'ёзным крокам у канкурэнцыі з папулярнай праграмай Apple для распазнання музыкі Shazam, з дапамогай якой карыстальнік можа знайсці неабходную кампазіцыю, запісаўшы (або «праслухаўшы») яе з дапамогай праграмы.
Карыстальнікі, якія цяпер маюць доступ да эксперыменту, могуць пераключыцца з галасавога пошуку ў YouTube на новую функцыю пошуку песень. Цяпер у тэставальнікаў ёсць магчымасць напяваць (без слоў), спяваць (са словамі) або запісаць песню на працягу трох і больш секунд, як у Shazam. Затым платформа ідэнтыфікуе мелодыю і накіруе карыстальніка да адпаведных відэа YouTube, якія паказваюць магчымыя варыянты шуканай песні.
Магчымасць пошуку па песнях даступная цяпер толькі невялікай частцы карыстальнікаў Android. Калі гэтая функцыя будзе распаўсюджвацца больш шырока, то яна будзе карыснай для вельмі вялікай аўдыторыі, бо YouTube з'яўляецца ці не найпапулярнейшым месцам для пошуку песень.
Гэты апошні эксперымент YouTube, верагодна, можа падацца некаторым карыстальнікам знаёмым. У 2020 годзе мацярынская кампанія Google упершыню запусціла падобную магчымасць у віджэце Google Search і ў Google Assistant, дазваляючы карыстальнікам знаходзіць песню, напяваючы ці насвістваючы матыў, або спяваючы, калі вы ведаеце словы. Аднак галоўная розніца палягае ў тым, што гэтая ўжо існая функцыя ад Google патрабуе напяваць на працягу не менш 10-15 секунд, каб ідэнтыфікаваць песню.
Як раней тлумачыў Google, функцыя пабудаваная на мадэлях машыннага навучання, якія могуць супастаўляць гудзенне чалавека з «адбіткам пальца» песні або фірмовай мелодыяй. Кампанія пацвердзіла выданню TechCrunch, што новы тэст YouTube выкарыстоўвае тую ж тэхналогію, што і ўжо існая функцыя.
Іншыя праграмы распазнавання музыкі, такія як SoundHound і MusixMatch, таксама могуць ідэнтыфікаваць песні праз спеў або напяванне мелодыі. Хоць яны не такія папулярныя ў параўнанні з YouTube і Google — тым не менш, вы можаце праверыць, як яны працуюць, ужо цяпер.
Цяпер чытаюць
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга151
Каментары