Экс-міністр сельскай гаспадаркі, а сёння памочнік Лукашэнкі па Віцебскай вобласці Ігар Брыло зладзіў у Гарадку прамую тэлефонную лінію і асабісты прыём людзей. Абмяркоўваліся пытанні рамонту жылля і дарог, адсутнасці вады і электрычнасці ў пасёлку з прыватнай забудовай, прагучала і нестандартнае пытанне.
Ураджэнка Гарадка пяты год у Віцебску жыве на Маскоўскім праспекце, і ў яе кватэры не вырашаецца праблема камароў, якія залятаюць з сырога падвала.
Яна звярталася ў ЖКГ, да санітарнага доктара, але праблема з вясны да восені застаецца вострай. Таксама ў пад'ездзе, паводле слоў заяўніцы, ніхто не прыбіраецца, нягледзячы на тое, што ў жыроўках рэгулярна прастаўляюць плату за гэты від працы.
Ігар Брыло адзначыў, што разбярэцца ў сітуацыі з прыцягненнем спецыялістаў камунальных службаў.
Жыхар Гарадка распавёў, што ў двухпавярховым доме, дзе ён пражывае, з боку слыхавога акна ў дождж працякае дах. Яго суседзі па 8-кватэрным доме таксама паскардзіліся на стан жылля. Кіраўніца райвыканкама распавяла, што дом старой забудовы, неаднаразова разглядалася пытанне мэтазгоднасці капрамонту. Частка кватэр прыватызаваная, жыхарам прапаноўвалі перасяліцца ў іншае месца, але тыя адмовіліся. Яна расказала, якія работы могуць праводзіцца за кошт бюджэту, а якія за сродкі жыхароў.
Ігар Брыло даручыў правесці рамонт даху і абследаваць будынак, а затым расказаць жыхарам пра варыянты абнаўлення.
Каментары