Каля Запарожжа ў абмялелай пасля падрыву Кахоўскай ГЭС зоне Дняпра знайшлі старажытны дубовы човен
У Запарожскай вобласці падчас абследавання абмялелай у выніку падрыву Кахоўскай ГЭС берагавой зоны выявілі дубовы човен, узрост якога можа дасягаць больш за 1000 гадоў. Пра гэта падчас брыфінгу сказала в. а. гендырэктара Нацыянальнага запаведніка «Хорціца» Святлана Ахрыменка, як паведамляе «Укрінфарм».
«Супрацоўнікі запаведніка падчас чарговага абследавання на раней затопленым участку берага знайшлі дубовы човен. Човен знаходзіўся на зрэзе вады і ўвесь час то высыхаў, то намакаў. Яго перамясцілі ў рэстаўрацыйны ангар для правядзення кансервацыйных работ», — сказала спецыялістка.
Па словах навуковага супрацоўніка Нацыянальнага запаведніка Алега Тубольцава, такіх чоўнаў на тэрыторыі Украіны выявілі каля 30.
Знойдзены човен выраблены з суцэльнага ствала дуба, яго даўжыня — 6 метраў 80 см, вышыня бартоў — каля паўметра.
Як адзначалася падчас брыфінгу, у мінулым каля берагоў вострава Хорціца знаходзілі падобныя чаўны, звязаныя са старажытнарускім паселішчам на ім. Яно існавала з X па XIV стагоддзе. Такія чаўны выкарыстоўваліся для рыбалоўства і іншых промыслаў, мясцовых перавозак, а таксама для абслугоўвання перапраў.
Знаходка была ў вельмі дрэнным стане. Па стане захаванасці драўніны эксперты мяркуюць, што ўзрост лодкі можа дасягаць больш за 1000 гадоў. Але больш дакладнае датаванне стане магчымым пасля правядзення радыевугляроднага аналізу. На чоўне ёсць нейкія асобныя сімвалы, але што яны азначаюць, пакуль незразумела.
Човен па частках перамясцілі ў рэстаўрацыйны ангар. Цяпер ён мае патрэбу ў тэрміновай кансервацыі, апрацоўцы спецыяльным хімічным растворам і ў далейшай рэстаўрацыі, каб стаць музейным экспанатам.
«Корпус чоўна захаваўся на 70%. Падчас раскопак ён расклаўся на некалькі элементаў. Працы шмат наперадзе. Будзем спадзявацца, што ўсё будзе добра і мы гэтую славутасць захаваем», — адзначыў удзельнік экспедыцыі, падчас якой човен быў выяўлены.
Раней паведамлялася, што ў выніку падрыву расіянамі Кахоўскай ГЭС у Дняпры пачаў рэзка зніжацца ўзровень вады. Для выяўлення помнікаў гісторыі і археалогіі, якія знаходзіліся на затопленых участках, супрацоўнікі Нацыянальнага запаведніка «Хорціца» вядуць штодзённы маніторынг прыбярэжнай паласы.
На раскопках у Беларусі знайшлі свістульку, якой 400 гадоў, і аднавілі яе гук. Вы паслухайце!
Падчас раскопак на месцы старога Менска знайшлі тысячагадовы грабеньчык
Вучоныя знайшлі самы старажытны надпіс, зроблены кірыліцай
Драўляны фалас змусіў інакш паглядзець на сэксуальнае жыццё старажытных рымлян
Цяпер чытаюць
Свецкае жыццё Дар’і Шманай: дні нараджэння дзяцей Кіркорава і Comedy Club3
Каментары