«Любімы гурт Пуціна» за час вайны атрымаў ад уладаў велізарныя грошы. Гэта больш, чым за папярэднія восем гадоў
Нават спявак Shaman, які стаў адным з галоўных галасоў гэтай вайны, зарабіў меней.
Гурт «Любэ» пасля 24 лютага 2022 года зарабіў на дзяржпадрадах 57,6 млн расійскіх рублёў (каля 725 тысяч даляраў), што на 35% больш, чым за папярэднія восем гадоў. Нават спявак Shaman, які стаў адным з галоўных галасоў гэтай вайны, зарабіў у 1,5 разу менш за «любімы гурт Пуціна» — блізу 38 млн рублёў (475 тысяч даляраў), падлічыла «Агенцтва», вывучыўшы звесткі сайта дзяржзакупак.
Самы вялікі ганарар пасля пачатку вайны гурту выплацілі за выступ на 50-годдзі горада Надыма ў верасні 2022 года — 10 млн рублёў (125 тысяч даляраў). Яшчэ за чатыры канцэрты «Любэ» заплацілі ад 6 млн рублёў (75 тысяч даляраў) у Мурманску, у Ніжнім Ноўгарадзе і двойчы ў Сочы.
За 2021 год «любімы гурт Пуціна» атрымаў дзяржпадрады на агульную суму 11,8 млн рублёў. Сярэдні чэк аднаго дзяржпадраду з пачатку вайны вырас адразу ўдвая. Калі ў 2021 годзе з адной дамовы гурт атрымліваў у сярэднім 2,4 млн рублёў, то пасля пачатку вайны гэтая лічба вырасла да амаль 5 млн расійскіх рублёў.
Апошні ўсплёск попыту на гурт сярод дзяржзаказчыкаў здарыўся ў 2014 годзе, калі расійскія ўлады анексавалі Крым. Тады за год «Любэ» зарабіла 7 млн расійскіх рублёў, што аж да 2021 года было рэкордам для гурта па гадавым даходзе з дзяржпадраду.
За 8 гадоў — з 2014 па 2021 гады — гурт зарабіў 42,4 млн рублёў.
Спявак Shaman, які стаў вядомым дзякуючы «патрыятычным песням» «Устанем» і «Я рускі», пасля пачатку вайны заключыў дамовы на выступы з дзяржустановамі і дзяржкампаніямі на 37,7 млн рублёў (471 тысяча даляраў). Яго максімальны даход з аднаго выступу — 8 млн рублёў (100 000 даляраў), такая сума выплат за выступы на Дні горада Нарыльска, Дні Усевалажска і ў Сочы.
Рост дзяржвыдаткаў на гурты накшталт «Любэ» пасля пачатку вайны, магчыма, звязаны з узмацненнем прапаганды. У песнях «Любэ» гаворыцца пра салдацкае братэрства, пачуццё абавязку перад Радзімай.
Доўгі час саліст гурта Мікалай Растаргуеў выступаў у вайсковым кіцелі. У расійскіх медыя калектыў часта называюць «любімым гуртом Пуціна», сам прэзідэнт Расіі прызнаваў, што ён яму падабаецца.
Пасля пачатку ўварвання ва Украіну Растаргуеў сустракаўся з вайскоўцамі і зычыў ім «вярнуцца з перамогай».
-
Дэпутата Еўрапарламента, які расследаваў злоўжыванні Pegasus, самога ўзламалі гэтай шпіёнскай праграмай
-
Расіянку, якая зрабіла ў бары «кальян на кулічы», усё ж не будуць адпраўляць у калонію
-
Ватыкан адлучыў ад царквы Брацтва святога Пія X. Раскольнікі маюць капліцу ў Мінску, дзе ўсё па-руску — што цяпер чакае гэтых вернікаў
Цяпер чытаюць
Радзільныя дамы спаборнічаюць, у каго 3 ліпеня народзіцца больш дзяцей12
Каментары