Японская кампанія iSpace паведаміла, што яе палёт на Месяц, хутчэй за ўсё, скончыўся няўдачай. Яна разлічвала стаць першай прыватнай кампаніяй, якая б паспяхова даставіла на Месяц даследчага робата, піша Руская служба Бі-бі-сі.
Кампанія iSpace, якая базуецца ў Токіа, спадзявалася, што пасадачны модуль выпусціць даследчы ўсюдыход, а таксама робата памерам з тэнісны мяч, распрацаванага вытворцам цацак.
Сувязь з месяцовым пасадачным модулем Hakuto-R была страчана за некалькі хвілін да таго, як ён павінен быў прызямліцца.
«Сувязь знікла, таму мы вымушаныя выказаць здагадку, што нам не ўдалося здзейсніць пасадку на паверхню Месяца», — заявіў выканаўчы дырэктар iSpace Такешы Хакамада, пакуль інжынеры ў Токіа спрабавалі аднавіць сувязь. Цяпер яны спрабуюць высветліць, што ж пайшло не так.
Па словах Хакамады, касмічны карабель быў запушчаны з мыса Канаверал у Фларыдзе на ракеце SpaceX летась у снежні і выканаў восем з дзесяці задач касмічнай місіі, вынікі якіх паслужаць для падрыхтоўкі наступнай спробы iSpace высадзіць месяцовы модуль. Яна запланавана на 2024 год. Карабель для яе ўжо будуецца.
Калі б пасадка модуля Hakuto-R была паспяховай, то касмічная праграма Японіі атрымала б дадатковы стымул. У апошні час яе пераследвалі няўдачы, пры тым, што ў краіны вялікія амбіцыі па стварэнні ўласных касмічных тэхналогій, уключаючы адпраўку японскага касманаўта на Месяц да канца гэтага дзесяцігоддзя.
На сённяшні дзень толькі ЗША, СССР і Кітай здзейснілі мяккія пасадкі касмічных караблёў на паверхню Месяца, іх праграмы фінансаваліся дзяржавай. Спробы Індыі і прыватнай кампаніі з Ізраіля пацярпелі няўдачы.
Цяпер чытаюць
Бабарыка тры хвіліны адказваў на пытанне, чый Крым. Так і не адказаў86
Каментары