Ашуканцы выманілі ў мінчанкі больш за 326 тысяч рублёў, выдаўшы сябе за міліцыянтаў і банкіраў
Ілжэбанкіры выманілі ў мінчанкі больш за 326 тысяч рублёў, паведаміў Следчы камітэт.
Афіцыйная прадстаўніца Следчага камітэта па горадзе Мінску Кацярына Гарлінская расказала:
«У адным з месенджараў 66-гадовай мінчанцы, якая працуе галоўным бухгалтарам на адным з прыватных прадпрыемстваў, патэлефанаваў невядомы. Мужчына прадставіўся супрацоўнікам міліцыі і паведаміў, што ашуканцы спрабуюць аформіць крэдыт на яе імя. Далей да размовы падключыўся нібыта супрацоўнік міжбанкаўскай службы бяспекі і папрасіў пацярпелую ўстанавіць спецыяльны дадатак аддаленага доступу для дадатковай абароны банкаўскіх картаў».
Жанчына выканала гэтае патрабаванне, чым дала магчымасць ашуканцам кантраляваць яе дзеянні.
«Пазней яшчэ адзін ілжэбанкір бачыў коды бяспекі, якія прыходзілі ёй з дапамогай смс-паведамленняў у сувязі са спісаннем грошай», — удакладнілі ў Следчым камітэце.
За чатыры з паловай гадзіны, якія ашуканцы «апрацоўвалі» ахвяру, яны змаглі выкрасці ў яе больш за 326 тысяч рублёў.
Цяпер чытаюць
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»34
Каментары