Пасол Украіны ў Беларусі: Вялікую небяспеку я бачу ў разгортванні сумеснай групоўкі войскаў
Амбасадар Украіны ў Беларусі Ігар Кізім у гутарцы з Delfi ацаніў верагоднасць уступлення беларускіх войскаў на тэрыторыю Украіны. Ён кажа, што не верыць ва ўвядзенне беларускай арміі ва Украіну, але не выключае ўдзелу ў вайне беларускіх вайскоўцаў у складзе сумеснай групоўкі.
У інтэрв’ю Delfi Кізім выказаў сумнеў, што кіраўніцтва Беларусі вырашыцца наўпрост адправіць беларускае войска на тэрыторыю Украіны.
«У самім беларускім грамадстве гэты генатып супраць захопніцтва — ён устояны, у адрозненне ад расійскага грамадства, дзе заваёўніцтва на працягу ўсёй гісторыі было галоўнай крыніцай існавання», — мяркуе пасол.
На яго думку, любая поўнамаштабная агрэсія беларускай арміі не будзе прынятая ў грамадстве.
«Для мяне асабіста гэта дастатковая падстава лічыць пагрозу не надта моцнай. Я спадзяваюся на мудрасць народа, і што ўлада да гэтага прыслухаецца», — кажа ён.
Але гэта не значыць, кажа Кізім, што беларускія вайскоўцы нейкім чынам не будуць удзельнічаць у нападзе на Украіну з беларускай тэрыторыі, калі такі зноў адбудзецца.
Да таго ж, працягваецца выкарыстанне тэрыторыі, інфраструктуры, паветранай прасторы Беларусі ў інтарэсах расійскай арміі.
Вялікую ж небяспеку пасол бачыць у разгортванні сумеснай групоўкі войскаў.
Ён звяртае ўвагу на тое, што незразумела будзе, калі «нешта здарыцца», хто будзе наступаць. «Можна сказаць, што гэта не беларускае войска ўступіла, а групоўка войскаў, а хто туды ўваходзіць, ці ўдзельнічаюць там беларускія вайскоўцы — гэта пытанне», — кажа ён.
І тады зноў могуць пачацца «гэтыя гульні, што мы тут ні пры чым». У такім варыянце Кізім бачыць больш пагроз.
«Не столькі трэба баяцца беларускай арміі, колькі прысутнасці тут расійскіх войскаў», — рэзюмуе пасол.
Цяпер чытаюць
Начальнік крымінальнага вышуку МУС бачыў прагулачны дворык СІЗА КДБ з акна свайго кабінета, а потым сам стаў вязнем3
Каментары