Шведскія сейсмолагі: На маршрутах «Паўночных патокаў» фіксаваліся выбухі
На маршрутах газаправодаў «Паўночны паток — 1» і «Паўночны паток — 2» зафіксавана два выбухі. Пра гэта заявіў дырэктар шведскай нацыянальнай сейсмічнай сеткі Б'ёрн Лунд у эфіры шведскага тэлеканала SVT.
«Добра відаць, як хвалі адскокваюць ад дна да паверхні. Няма сумневаў, што гэта быў выбух», — расказаў Б'ёрн Лунд. Адзін з выбухаў магнітудай 2,3 быў зарэгістраваны вымяральнымі станцыямі.
Выбухі, сцвярджае шведскі тэлеканал, адбыліся ў тым жа самым раёне, дзе раней была зафіксаваная ўцечка газу.
Акрамя таго, Міністэрства абароны Даніі паказала відэа ўцечкі на газаправодзе «Паўночны паток — 2», знятае з паветра. На відэа — бурлівы круг шырынёй у некалькі сотняў метраў.
Цяпер у Балтыйскім моры ўстаноўленыя забароненыя зоны — у мэтах бяспекі суднаходства і авіяпералётаў.
Нагадаем, учора Данія, а сёння і Швецыя заявілі аб наяўнасці ўцечак з газаправодаў «Паўночны паток — 1» і «Паўночны паток — 2». Яны былі выяўленыя ў раёне вострава Борнхальм. Па звестках Шведскай марской адміністрацыі, пашкоджаныя газаправоды ў трох месцах, асноўная версія здарэння — дыверсія.
35 маладых беларусаў і беларусак, за якімі варта сачыць: апублікаваны першы спіс Next 3532
Каментары