Польскія спецслужбы прадставілі сваю версію інцыдэнту з самалётам Ryanair
Прэс-сакратар міністра — каардынатара спецслужбаў Польшчы Станіслаў Жарын апублікаваў у сябе ў Фэйсбуку відэапрэзентацыю польскага расследавання інцыдэнту з Ryanair. Учора пракуратура падзялілася высновамі расследавання. Іх таксама агучваў у эфіры польскіх СМІ Станіслаў Жарын, паведамляе reform.by.
У прыватнасці, гаворка ішла пра тое, што 23 мая ў дыспетчарскай аэрапорта «Мінск» знаходзіўся супрацоўнік КДБ, які і прыняў рашэнне аб пасадцы самалёта ў Мінску. Паведамляецца, што ён пры гэтым быў на сувязі з яшчэ адным чалавекам, якому дакладваў аб усіх дзеяннях. Адзначалася, што самалёту не пагражала небяспека выбуху, а сам інцыдэнт быў аперацыяй беларускіх спецслужбаў, мэтай якой было затрыманне Рамана Пратасевіча.
У відэароліку, апублікаваным Жарынам сёння, аргументацыя пашыраная. У ім гаворыцца, што ў гэты дзень працаваў дыспетчар Алег Галегаў. Каля 9:00 універсальнага часу (12:00 па Мінску) у залу кантролю палётаў зайшоў кіраўнік «Белаэранавігацыі» Леанід Чуро і чалавек, якога ў Польшчы назвалі супрацоўнікам спецслужбаў. Пасля гэтага Чуро сышоў.
Мужчына праінфармаваў дыспетчараў, што на борце самалёта Ryanair знаходзіцца бомба, і ён павінен сесці ў Мінску. Польскія спецслужбы сцвярджаюць, што былі прынятыя меры для таго, каб размовы з рэйсам не былі чутныя ў іншых самалётах. Пры гэтым нібыта абслугоўваннем рэйса займаўся адзін дыспетчар пад кантролем спецслужбіста. У роліку гаворыцца, што мужчына звязваўся па тэлефоне з чалавекам, якога называў Андрэй Анатолевіч.
У 9:30 універсальнага часу самалёт увайшоў у паветраную прастору Беларусі.
У прэзентацыі прыводзяцца фрагменты запісаў перамоў дыспетчара з экіпажам самалёта. Асабліва адзначаны фрагмент перамоваў, у якім пілот цікавіцца узроўнем небяспекі. Дыспетчар просіць яго заставацца на сувязі, а затым звяртаецца на рускай мове да нейкага мужчыны: «Ён кажа: код паведамлення жоўты ці чырвоны». Мужчына адказвае яму, каб сказаў, што код — чырвоны.
Далей польскі бок паведамляе, што самалёт змяніў курс за дзве хвіліны да выхаду з паветранай прасторы, і пасля гэтага «прадстаўнік спецслужбаў» пакінуў залу кантролю палётаў.
У прэзентацыі таксама акцэнтуецца ўвага на тым, што паведамленне пра бомбу, нібыта адпраўленае рухам Хамас, было атрыманае аэрапортамі Вільні, Афін, Сафіі, Бухарэста і Кіева ў перыяд з 9:25 да 09:34 універсальнага часу, а ў аэрапорт Мінска яно паступіла толькі а 09:56 універсальнага часу. Самалёт сеў у мінскім аэрапорце каля 10:00 універсальнага часу (13:00 па Мінску).
Польскі бок таксама прадэманстраваў відэазапісы дзеянняў у аэрапорце Мінска і паказвае, што дзеянні служачых не былі адэкватныя пагрозе выбуху, аб якой паведамлялася ў перамовах.
Каментары