Рэдактар аддзела «СБ»: Не трэба гуляць у выбары. Кіраўнік, які дасягнуў стабільнасці, змяняцца не павінен
Рэдактар аддзела расследаванняў «Советской Белоруссіі» Раман Рудзь прызнаўся ў фэйсбуку, што не бачыць сэнсу ў правядзенні прэзідэнцкіх выбараў кожныя 5 гадоў. На яго думку, кіраўнік краіны, які дасягнуў грамадзянскага міру і больш-менш стабільнага жыцця, павінен кіраваць як мага даўжэй — «законна і па-чалавечы».
«Вы кажаце з ціхім жахам аб 26 гадах [кіравання Лукашэнкі], як быццам гэта нешта дрэннае. Я кажу пра нязменнасць улады, як пра нешта добрае.
Яе зменлівасць не для славянскага менталітэту. У індывідуалістычнай Еўропе хай гуляюць, але ў нашым калектыўнай, калі хочаце, племянной свядомасці правадыр павінен кіраваць як мага даўжэй. Гэта гарантыя ад разладаў і вечнай крыві на фоне падзелу ўлады.
5-гадовы тэрмін прэзідэнцтва — гэта рэверанс 90-х гадоў у бок навязанай нам звонку мадэлі ўлады.
На прыкладзе Украіны мы бачым, што гэта правальны шлях: там з кожным новым прэзідэнтам да ўлады прыходзяць новыя групы, якія пачынаюць ірваць краіну на кавалкі.
Я абсалютна ўпэўнены, што адзіны кіраўнік, калі ён дасягнуў грамадзянскага міру і больш-менш стабільнага жыцця, змяняцца не павінен. Законна і па-чалавечы. Назарбаеў у якасці прыкладу.
Больш не трэба гуляць у гэтую бясконцую перадвыбарчую гульню, марнуючы кожныя пяць гадоў на тое, каб дагадзіць наглядчыкам. Стомлены лідар сыдзе сам, калі адчуе сябе слабым. А гвалтоўныя спробы скараціць яго тэрмін прывядуць толькі да гвалту. Зноў жа, Януковіч у якасці прыкладу», — перакананы Раман Рудзь.
Каментары